NARINC XATUNUN 75 İLLİK YUBİLEYİ SAZ VƏ SÖZ BAYRAMINA ÇEVRİLMİŞDİR
Elm, mədəniyyət, incəsənət xadimlərinin, saz və söz ustalarının, ictimaiyyət nümayəndələrinin iştirak etdiyi tədbirdə filologiya elmləri doktoru, professor Qəzənfər Paşayev, professor Həsən Mehdiyev, xalq şairi Fikrət Sadıq, folklorçu alim Ağalar Mirzə və başqaları “Aşıq Pəri” məclisinin yaradılmasında Narınc Xatunun fəaliyyətindən danışmışlar. Böyük fədakarlıqla, müdrikliklə tədqiqatlar aparan, neçə-neçə el sənətkarını üzə çıxaran, bütün dünyada tanınan “Aşıq Pəri” məclisinin təşkilatçısı, rəhbəri kimi Narınc Xatunun Azərbaycan mədəniyyətinin inkişafında xıdmətləri vurğulanmışdır.
“Aşıq Pəri” məclisinin üzvlərindən Gülarə Azaflı, Solmaz Kosayeva, Kəmalə Qubadlı, Şükufə Naxçıvanlı və başqaları şeirlərini oxumuş, yubilyarı təbrik etmişlər.
Neftçala Rayon İcra Hakimiyyəti adından Narınc Xatuna xatirə hədiyyəsi verilmişdir.
Narınc Xatun tədbirin təşkilatçılarına və iştirakçılara minnətdarlığını bildirmişdir.
