NARKOTİKLƏR BÖYÜMƏKDƏ OLAN NƏSİL ÜÇÜN BÖYÜK TƏHLÜKƏDİR
İşçi qrupunun rəhbəri İsrafil Əliyev çıxışında ölkəmizdə narkomanlığa və narkotik vasitələrin qanunsuz dövriyyəsinə qarşı mübarizə sahəsində Dövlət Komissiyasının gördüyü işlərdən və əldə olunmuş nəticələrdən danışmışdır. O, konfrans iştirakçılarına müraciətlə xahiş etmişdir – yeniyetmələrə, gənclərə dönə-dönə tövsiyə etsinlər, onları inandırsınlar ki, heç kəsin sözünə aldanmasınlar. Çünki narkotiklərə alışandan sonra ondan yaxa qurtara bilməyəcəklər. Ölkəmizin gələcəyi üçün isə sağlam gənclər lazımdır. Azərbaycan Prezidentinin təşəbbüsü ilə respublikanın bütün bölgələrində ən müasir standartlara uyğun Olimpiya İdman Komplekslərinin inşasının, dövlətimizin başçısının ölkəmizdə bədən tərbiyəsi və idmanın inkişafına, yeniyetmələrin və gənclərin sağlam böyüməsinə xüsusi əhəmiyyət verməsinin “yaşıl ölümlə” mübarizədə yeni imkanlar açdığını vurğulayan İşçi qrupunun rəhbəri yerlərdə bu imkanlardan maksimum istifadənin vacibliyini bildirmişdir.
Konfransda Ailə, Qadın və Uşaq Problemləri Dövlət Komitəsinin, Bakı Şəhər Narkoloji Dispanserinin, Gənclər və İdman Nazirliyinin, DİN-in Baş Narkotiklərlə Mübarizə İdarəsinin nümayəndələri çıxış edərək, ölkədə narkomanlığın yayılmasının qarşısının alınması, narkotik vasitələrin qanunsuz dövriyyəsi ilə mübarizə, qabaqlayıcı profilaktik tədbirlər və narkomanlığın fəsadları barədə ətraflı söhbət açmışlar.
Sonra konfrans iştirakçılarını maraqlandıran suallara cavab verilmişdir.
