Naxçıvana aylıq normanın 94 faizi yağıb
Bakı, 23 may, AZƏRTAC
Ekologiya və Təbii Sərvətlər Nazirliyi ötən gün Naxçıvan şəhərində güclü yağış yağması ilə bağlı açıqlama verib.
Milli Hidrometeorologiya Xidmətinin Proqnozlar Bürosunun direktoru Gülşad Məmmədova AZƏRTAC-a bildirib ki, dünən axşam və bu gecə Naxçıvan MR-da leysan xarakterli yağış yağıb, şimşək çaxıb, dolu düşüb: “Düşən yağıntının miqdarı Naxçıvanda 37.0 millimetr (aylıq normanın 94 faizi), Şahbuzda 5.0 millimetr, Ordubadda 2.0 millimetr olub”.
O qeyd edib ki, ötən gün saat 18:40 radələrində Naxçıvanda diametri 6 millimetr olan dolu düşüb: “Ötən gün Naxçıvanda qərb küləyi arabir 20 metr/saniyəyədək güclənib. Havanın temperaturu Bakıda iqlim normasından 3 dərəcə yuxarı olub, havanın maksimal temperaturu Bakıda və Abşeron yarımadasında 30°-dək isti, Naxçıvanda 28°-dək isti, dağlıq rayonlarda 22-26° isti, yüksək dağlıq ərazilərdə 11°-dək isti, aran rayonlarında 33°-dək isti olub”.
Bölmənin digər xəbərləri
