Naxçıvanda biomüxtəlifliyin qorunması istiqamətində kompleks tədbirlər həyata keçirilir
Naxçıvan, 6 may (AZƏRTAC, Rauf Əliyev). AMEA Naxçıvan Bölməsinin Bioresurslar İnstitutunda muxtariyyət illərində Naxçıvan təbiətinin tədqiqi vəziyyətinə həsr olunmuş elmi konfrans keçirilmişdir.
AZƏRTAC xəbər verir ki, konfransda institutun direktoru, AMEA-nın müxbir üzvü Tariyel Talıbovun mövzuya dair məruzəsi dinlənilmişdir. Bildirilmişdir ki, ölkəmizdə, o cümlədən muxtar respublikada ətraf mühitin mühafizəsi, ekologiyanın qorunması istiqamətində məqsədyönlü kompleks tədbirlər, həmçinin müvafiq dövlət proqramları həyata keçirilir.
Elmi konfransda institutun bitki sistematikası şöbəsinin müdiri, biologiya elmləri doktoru, professor Əliyar İbrahimov muxtariyyət illərində Naxçıvan florasının öyrənilməsi və ondan istifadə, zooloji tədqiqatlar şöbəsinin müdiri, biologiya üzrə fəlsəfə doktoru, dosent Akif Bayramov muxtar respublikanın faunasının öyrənilməsi sahəsində əldə olunan nəticələr, zooloji tədqiqatlar şöbəsinin böyük elmi işçisi, biologiya üzrə fəlsəfə doktoru, dosent Arzu Məmmədov muxtariyyət illərində aparılan orintoloji tədqiqatlar barədə elmi məruzələrlə çıxış etmişlər.
Sonda konfrans iştirakçılarını maraqlandıran suallar cavablandırılmışdır.
Bölmənin digər xəbərləri
