Naxçıvan, 10 mart (AZƏRTAC, Tural Kəngərli). Ümummilli lider Heydər Əliyev Azərbaycanda ikinci dəfə siyasi rəhbərliyə gəldikdən sonra əhalinin etibarlı ərzaq təminatı daim dövlətin iqtisadi siyasətinin başlıca istiqamətlərindən biri olmuşdur. Ulu Öndər respublikamızın daxili imkanları hesabına əhalinin zəruri ərzaq məhsulları ilə təminatına böyük önəm vermiş və bu istiqamətdə bir çox məqsədyönlü tədbirlər həyata keçirmişdir. Hələ ötən əsrin 90-cı illərində MDB məkanında ilk dəfə Azərbaycanda torpaq islahatlarının aparılması, kənd təsərrüfatı istehsalçılarına yardım mexanizmlərinin formalaşdırılması, beynəlxalq təşkilatlarla bu sahədə əhəmiyyətli layihələrin həyata keçirilməsi, həmçinin 2001-ci ildə təsdiq edilmiş  “Azərbaycan Respublikasının ərzaq təhlükəsizliyi Proqramı” çərçivəsində görülmüş işlər ölkədə kənd təsərrüfatı və ərzaq məhsullarının istehsalının artımına yol açmışdır.

Bu siyasətin Prezident İlham Əliyev tərəfindən uğurla davam etdirilməsi nəticəsində hazırda ölkəmiz bir çox strateji ərzaq məhsullarına tələbatını yerli istehsal hesabına ödəyir və hətta xarici ölkələrə məhsul ixrac edir.

Azərbaycan Prezidenti İlham Əliyev Nazirlər Kabinetinin 2013-cü ilin sosial-iqtisadi inkişafının yekunlarına və 2014-cü ildə qarşıda duran vəzifələrə həsr olunmuş iclasındakı yekun nitqində demişdir: “Bu gün Azərbaycanda bütün əsas ərzaq məhsulları istehsal edilir, bəzi məhsulların istehsalı tələbatımızı tam ödəyir, bəzi sahələrdə hələ ki, idxaldan asılıyıq. Demək istəyirəm ki, Azərbaycanda bütün əsas ərzaq məhsulları tam şəkildə öz tələbatımızı təmin etməlidir. Biz buna yaxınlaşırıq və çalışmalıyıq ki, növbəti 5 il ərzində, bəlkə də ondan da tez bir müddətdə 3-cü regional inkişaf proqramının icrası başa çatanda artıq ərzaq təhlükəsizliyi ilə bağlı olan bütün məsələlər öz həllini tapsın. Kənd təsərrüfatı texnikasının alınması və Azərbaycanda istehsalı ilə bağlı konkret fikirlər, təkliflər vardır. Biz texnika parkımızı yeniləşdiririk, yeniləşdirəcəyik. Dövlət vəsait ayırır və ayıracaqdır”.

Azərbaycan Prezidentinin 2008-ci il 25 avqust tarixli Sərəncamı ilə təsdiq edilmiş “2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair Dövlət Proqramı” da respublikanın ərzaq təhlükəsizliyinin təmin edilməsi baxımından müstəsna əhəmiyyətə malikdir. Dövlət Proqramında əkinə yararlı torpaq sahələrindən səmərəli istifadə olunması, bitkiçiliyin, xüsusən taxılçılığın, meyvəçiliyin, tərəvəzçiliyin, üzümçülüyün, heyvandarlığın, o cümlədən ət və süd məhsulları istehsalının inkişaf etdirilməsi üzrə nəzərdə tutulmuş tədbirlərin vaxtında və uğurla həyata keçirilməsi ölkədə ərzaq məhsullarının istehsalında artıma və hər bir ölkə vətəndaşının keyfiyyətli və təhlükəsiz ərzaq məhsullarına tələbatının tam ödənilməsinə şərait yaratmışdır.

Bu gün dövlət tərəfindən kənd təsərrüfatı istehsalçılarına və emal müəssisələrinə geniş texniki və maliyyə dəstəyinin göstərilməsi aqrar bölmənin inkişafında mühüm rol oynayır. “Kənd təsərrüfatı məhsulları istehsalçılarına dövlət dəstəyi haqqında” Azərbaycan Prezidentinin 2007-ci il 23 yanvar tarixli Sərəncamına uyğun olaraq, kənd təsərrüfatı məhsulları istehsalçılarının istifadə etdikləri yanacağın, mühərrik yağının və mineral gübrələrin dəyərinin orta hesabla 50 faizinin dövlət tərəfindən ödənilməsi, buğda səpininin, toxum və ting istehsalının subsidiyalaşdırılması kənd təsərrüfatı istehsalına güclü təkan vermişdir. Bununla yanaşı, ölkəyə xaricdən damazlıq heyvanların gətirilməsi və istehsalçılara lizinq yolu ilə 50 faiz güzəştlə satılması həyata keçirilir.

Ölkədə aparılan aqrar siyasətin tərkib hissəsi kimi lizinq münasibətlərinin inkişafı məqsədilə 2005-ci ildə “Aqrolizinq” Açıq Səhmdar Cəmiyyəti (ASC) yaradılmışdır. Adıçəkilən qurumun xətti ilə müxtəlif növ kənd təsərrüfatı texnikaları, texnoloji avadanlıqlar, damazlıq inəklər, mineral gübrə və pestisidlər dövlət büdcəsindən ayrılmış vəsait hesabına respublikaya gətirilərək fermerlərə güzəştli şərtlərlə satılır.

Xatırladaq ki, 2013-cü il iyulun 4-də  Prezident İlham Əliyevin müvafiq Sərəncamı ilə istehsalçıların taxılyığan kombaynlara ehtiyacını təmin etmək üçün dövlət büdcəsindən  “Aqrolizinq” ASC-yə 15 milyon vəsait ayrılmışdır.

Bu gün bütün ölkədə olduğu kimi, Naxçıvan Muxtar Respublikasında da əhalinin ərzaq təhlükəsizliyinin təmin edilməsi və aqrar-sənaye kompleksinin inkişafı istiqamətində məqsədyönlü tədbirlər həyata keçirilir, kənd təsərrüfatının inkişafı və torpaq mülkiyyətçilərinə əlverişli şərait yaradılır.

Kənd təsərrüfatı məhsulları istehsalçılarının texnikaya olan tələbatının daha dolğun şəkildə ödənilməsi məqsədilə Naxçıvan Muxtar Respublikası Ali Məclisinin Sədri Vasif Talıbovun 2005-ci il 28 yanvar tarixli Sərəncamı ilə “Naxçıvan Aqrolizinq” Açıq Səhmdar Cəmiyyəti (ASC) yaradılmışdır. Hazırda “Naxçıvan Aqrolizinq” ASC-də aqrar sahədə fəaliyyət göstərən sahibkarların, fermerlərin, kənd əməkçilərinin sifarişləri əsasında 20-dən artıq müxtəlif xidmətlər həyata keçirilir.

ASC tərəfindən sərfəli şərtlərlə uzun müddətə lizinqə verilən kənd təsərrüfatı texnikaları iqtisadi səmərəlilik baxımından mühüm əhəmiyyət daşıyır. Hazırda alınmış texnika və avadanlıqlar dəyərinin 10 faizi əvvəlcədən, qalan hissəsi isə növbəti 9 il müddətinə ödənilmək şərti ilə satılır. 2013-cü ildə 116 ədəd müasir kənd təsərrüfatı texnikası alınmışdır. Çin və İtaliya istehsalı olan 18 traktor, Finlandiya istehsalı olan “Sampo” markalı kombaynlar müasir tələblər səviyyəsindədir. Türkiyə istehsalı olan 6 dəst kartofəkən və kartofçıxaran, 4 çiləyici və 20 kotan, yonca və taxılsəpənlər, taxıltəmizləyənlər, qaba yemdoğrayan maşınlar, 16 kipvuran və 10 dırmıq, 5 diskli otbiçən, 2 lafet, 5 torpaqyumşaldan və digər texnika təsərrüfat işlərinin görülməsində istifadə olunacaqdır.

Ötən dövr ərzində “Naxçıvan Aqrolizinq” ASC-nin xətti ilə 1370 ədəd texnika gətirilmiş, onlardan 965-i lizinq yolu ilə torpaq mülkiyyətçilərinə satılmışdır. Muxtar respublikada kənd təsərrüfatı istehsalçılarının texnika və digər texniki vəsaitlərlə təminatı yüksək səviyyədədir və deməyə əsas verir ki, dövlətimizin başçısının əhalinin ərzaq məhsulları ilə təminatının daxili imkanlar hesabına yerinə yetirilməsi barədə göstərişləri Naxçıvanda da uğurla həyata keçirilir.

Naxçıvan Muxtar Respublikasında kənd təsərrüfatı istehsalçılarının istifadəsində olan müxtəlif texnika, o cümlədən 108 tırtıllı traktor, 835 təkərli traktor, 50 buldozer, 114 ekskavator, 135 taxılyığan, 28 yemyığan kombayn, 296 traktor yedəyi, 949 asma və qoşulan digər texniki vasitələr əkin-biçin işlərinin vaxtlı-vaxtında aparılmasına, məhsulun itkisiz yığılmasına və nəticə etibarilə bol məhsul əldə edilməsinə şərait yaratmışdır.

Prezident İlham Əliyevin dəfələrlə vurğuladığı kimi, etibarlı ərzaq təminatı hər bir ölkənin iqtisadi sabitliyinin və sosial dayanıqlılığının başlıca şərtidir. Deyə bilərik ki, dövlətimizin başçısının əhalinin ərzaq məhsulları ilə etibarlı təminatı məqsədilə vaxtaşırı verdiyi tapşırıqlar, tövsiyələr, imzaladığı fərman və sərəncamlar, dövlət proqramları, Azərbaycanın ərzaq təhlükəsizliyinin təmin edilməsində müstəsna əhəmiyyət kəsb edən digər göstərişləri, qarşıya qoyulmuş vəzifələr Naxçıvanda bundan sonra da uğurla icra olunacaqdır.