NAZİRLƏR KABİNETİNDƏ MÜŞAVİRƏ
“Erməni millətçilərinin apardığı etnik təmizləmə nəticəsində Ermənistan ərazisindəki öz tarixi torpaqlarından didərgin salınmış azərbaycanlıların məskunlaşması problemlərinin həlli haqqında” Azərbaycan Respublikası Prezidentinin 2001-ci il 22 avqust tarixli Fərmanının icrası ilə əlaqədar sentyabrın 3-də baş nazir Artur Rasizadənin yanında müşavirə keçirilmişdir.
Artur Rasizadə müşavirəni açaraq dedi ki, Prezidentin Fərmanında Nazirlər Kabineti, yerli icra hakimiyyəti orqanları, ayrı-ayrı nazirliklər və baş idarələr qarşısında mühüm vəzifələr qoyulur və onlar bu mühüm tarixi sənəddən irəli gələn məsələləri dəqiq və vaxtında həll etməlidirlər.
Baş nazir çıxışında qaçqınların məskunlaşması, tikinti işlərində, bütün proqramın həyata keçirilməsi cədvəlinin tərtibində iştirakı zamanı onların könüllülüyünün təmin olunması məsələlərinə də toxundu.
Sonra baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov məruzə etdi. O dedi ki, vətəndaşlar komitəyə 1000-dən çox məktub və teleqram göndərərək, qaçqınların problemlərinə qayğı və diqqətinə görə Azərbaycan Prezidenti Heydər Əliyevə minnətdarlığını bildirmişlər.
Əli Həsənov vurğuladı ki, bu tarixi sənədin giriş hissəsində azərbaycanlılara qarşı kütləvi etnik təmizləmə prosesi ətraflı təhlil edilir və göstərilir ki, onun nəticəsində XX əsrin müxtəlif dövrlərində 2 milyonadək soydaşımız öz tarixi vətənindən köçürülmüşdür. Fərmanda qaçqınların əsas problemləri - 1000-dək qaçqın ailəsinin daimi yaşayış yeri ilə təmin olunmaması, Ermənistandakı evlərini və ya mənzillərini dəyişdirmiş 170 qaçqın ailəsinin Bakıda pasport qeydiyyatına alınmasına rədd cavabı verilməsi, dövlət mülkiyyətində olan və onların yaşadıqları tikililərin yerləşdiyi torpaq sahələrinin əvəzsiz olaraq həmin ailələrə verilməsi problemləri nəzərə çarpdırılmışdır.
Əli Həsənov Fərmanın ayrı-ayrı maddələrindən söz açaraq dedi ki, qaçqınlar qovulduqları yaşayış yerlərinə qayıtmayınca, onların statusu qüvvədə qalacaqdır. Lakin əhalinin bu kateqoriyasının statusunun onlara verilən dövlət güzəştlərinə heç bir dəxli yoxdur. Fərmanın müddəalarının yerinə yetirilməsi üçün prinsipial olan digər mühüm məsələ yerli icra hakimiyyəti orqanları tərəfindən qaçqın ailələrinin dəqiq siyahılarının təqdim edilməsidir.
Natiq bildirdi ki, Bakıda və Naxçıvan Muxtar Respublikasında yaşayan qaçqınlar istisna olmaqla, qalanlarına Goranboy rayonundakı Aşağı Ağcakənd və Yuxarı Ağcakənd kəndlərində bərpa olunacaq evlər təklif ediləcəkdir. Bərdə və Ağstafa rayonlarında yerləşdirilmiş 85 ailənin razılığı artıq alınmışdır. Onlara ayrılan bütün torpaq sahələri sosial infrastrukturların yaxınlığında olmalıdır.
Əli Həsənov məruzəsinin sonunda Azərbaycan Prezidenti Heydər Əliyevi əmin etdi ki, hökumət strukturları həmin Fərmandan irəli gələn vəzifələrin uğurla yerinə yetirilməsi üçün səylərini əsirgəməyəcəklər.
Sonra baş nazirin müavini Abid Şərifov çıxış edərək, evlərin tikilməsinə dair layihələrin hazırlanması, elektrik enerjisi verilməsi, qaçqınlara iş yerləri yaradılması məsələlərinə toxundu.
Müşavirədə Naxçıvan Muxtar Respublikası Nazirlər Kabineti sədrinin müavini Məmməd Abbasov, İşğaldan Azad Edilmiş Ərazilərin Bərpası və Yenidən Qurulması Agentliyinin direktoru Əli Məmmədov, Dövlət Tikinti və Arxitektura Komitəsinin sədri Şair Həsənov, digər baş idarələrin rəhbərləri də çıxış etdilər.
Baş nazirin birinci müavini Abbas Abbasov müşavirənin işində iştirak edirdi.
Bölmənin digər xəbərləri
