NAZİRLƏR KABİNETİNDƏ MÜŞAVİRƏ
Sentyabrın 4-də Nazirlər Kabinetində respublika hökumətinin “Azərbaycan Respublikası Nazirlər Kabinetinin bəzi qərarlarına dəyişikliklər edilməsi haqqında” 2001-ci il 20 avqust tarixli qərarının icrası ilə bağlı müşavirə keçirilmişdir.
Müşavirəyə sədrlik edən baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov bildirdi ki, bu qərarla “Məcburi köçkünlərə dövlət tərəfindən müəyyən edilmiş müavinətlərin verilməsinin tənzimlənməsi haqqında” 1993-cü il 6 dekabr tarixli qərara, - həmin qərara görə məcburi köçkünlərə ərzaq müavinəti müvəqqəti məskunlaşdıqları ərazilərdə verilirdi, - düzəliş edilmişdir. İndi həmin yardımın ödənilməsi Birləşmiş Universal Səhmdar Bankı tərəfindən həyata keçiriləcəkdir. Bu düzəlişdən məqsəd ödənişlərin vaxtında verilməsini təmin etmək və mövcud nöqsanları aradan qaldırmaqdır. Odur ki, müşavirəyə dəvət edilmiş işğal altında olan rayonların icra hakimiyyəti başçıları və Birləşmiş Universal Səhmdar Bankının əməkdaşları bu çox mühüm işdə yaranmış mənfi halları aradan qaldırmaq naminə əlbir işləməlidirlər. Qaçqınlara və məcburi köçkünlərə ərzaq müavinətlərinin ödənməsi məsələsi Azərbaycan Prezidenti Heydər Əliyevin daim diqqət mərkəzindədir. Bu isə hökumət qurumlarının məsuliyyətini ikiqat artırır.
Əli Həsənov vurğuladı ki, ölkəyə rəhbərlik etdiyi illərdə Azərbaycan Prezidentinin Sərəncamı ilə ərzaq müavinətlərinin məbləği yeddi dəfə artırılmışdır. Bu məqsədlə dövlət büdcəsindən hər il 187 milyard manat vəsait ayrılır. Icra hakimiyyəti orqanlarının əsas vəzifəsi bu vəsaiti məcburi köçkünlərə vaxtında ödəməkdir.
Baş nazirin müavini bildirdi ki, bir çox hallarda icra hakimiyyəti orqanlarının təqdim etdikləri siyahılarda yanlışlığa yol verilir ki, bu da pul vəsaitindən düzgün istfadə olunmamasına gətirib çıxarır. Dövlətqaçqınkomun əməkdaşlarının apardıqları yoxlamalar zamanı yardıma ehtiyacı olanların sayının artırılması faktları aşkara çıxarılmışdır. Yoxlamalardan sonra onların sayı 15 min nəfər azalmışdır. Əli Həsənov dedi ki, bu barədə Azərbaycan Prezidentinə məlumat vermişdir.
Sonra Birləşmiş Universal Səhmdar Bankı idarə heyətinin sədri Zakir Zeynalov, maliyyə nazirinın müavini Heydər Əsədov, işğal altında olan rayonların icra hakimiyyəti başçıları çıxış edərək, qərarın icrası ilə bağlı fikirlərini söylədilər.
Bölmənin digər xəbərləri
