Neokolonializmin iqlim dəyişmələrinə təsiri məsələsi dünya siyasətinin gündəliyinə gətirilib ŞƏRH
Bakı, 14 noyabr, AZƏRTAC
Noyabrın 13-də Bakıda COP29 çərçivəsində inkişaf etməkdə olan kiçik ada dövlətlərinin Sammitində Prezident İlham Əliyevin zaman etibarilə kiçik, mahiyyətcə dərin olan nitqi bir neçə prinsipial məsələ baxımından dünya siyasətinin gündəliyinə keçdi, mövcud problemlərin həllində yol göstərdi. Hər şeydən əvvəl, kiçik ada dövlətlərinin yanında olduğunu göstərən Azərbaycan onların beynəlxalq aləmdə haqq səsinin eşidilməsinin vacibliyini bildirdi. Bu o deməkdir ki, ölkələrin ərazisinin kiçikliyi, əhalisinin sayının azlığı onların səsinin boğulması olmamalı, müstəmləkə keçmişi olan dövlətlər onlara maddi və texniki yardım etməlidirlər. Azərbaycan kiçik ada dövlətlərinə yardım etməklə bir çox ölkələrə nümunə olub.
Bu sözləri AZƏRTAC-a açıqlamasında Milli Məclis sədrinin müavini Musa Qasımlı deyib.
O bildirib ki, Ermənistan tərəfindən ərazilərinin işğalının nəticələrindən əziyyət çəkməsinə və işğaldan azad edilmiş ərazilərini təkbaşına bərpa etməsinə baxmayaraq, Azərbaycan bir sıra ölkələrə qasırğa, zəlzələ və daşqınların təsirini azaltmaqdan ötrü yardım göstərib, su təchizatı, qida təhlükəsizliyi və mədəni irsin bərpası layihələrinə dəstək verib, onlar üçün kadrlar hazırlayıb. Ondan çox kiçik ada dövləti Azərbaycan universitetlərində təhsil almaq üçün tələbə təqaüdü proqramından yararlanıb.
Qoşulmama Hərəkatında dördillik sədrliyi dövründə Azərbaycanın 80-dən çox ölkəyə, o cümlədən 20 kiçik ada dövlətinə maliyyə və humanitar yardım göstərdiyini vurğulayan Musa Qasımlı əlavə edib: “Özünün ehtiyacı olmasına baxmayaraq, Azərbaycan dövləti Millətlər Birliyinin kiçik ada dövlətlərindəki birgə layihələrini dəstəkləmək üçün 10 milyon ABŞ dolları məbləğində vəsait ayırır. Bu, Azərbaycanın böyüklüyüdür və siyasətinin mahiyyətini açır.
Dövlətimizin başçısı nitqində beynəlxalq münasibətlər tarixində ilk dəfə olaraq neokolonializmin iqlim dəyişmələrinə təsiri məsələsini dünya siyasətinin gündəliyinə gətirdi. Bu gün neokolonializm siyasətinin başında gələn Fransa və Niderland kimi ölkələrin dəniz ərazilərinin əhalisinin səsi metropoliyalardakı rejimlər tərəfindən susdurulur. Fransa Polineziyasının və Yeni Kaledoniyanın müstəmləkəçilikdən xilas olmaq prosesi 70 ildən çoxdur yubanır. Fransanın bu əraziləri nüvə silahlarının sınağı meydanına çevirməsi nəticəsində torpaq və suyun zəhərlənməsi və radiasiya səviyyəsi artıb. Bu, həm ətraf mühitə, həm də insanlığa qarşı ağır cinayətdir.
Fransanın belə cinayətkar siyasəti korrupsiyaya uğramış, siyasi riyakarlığın təcəssümü olan Avropa Komissiyası, Avropa Parlamenti və Avropa Şurasının Parlament Assambleyası tərəfindən pislənilməyib. Dövlətimizin başçısının Fransadakı bütün siyası məhbusların dərhal azad olunmasını tələb etməsi isə ciddi bir tələb və çağırış idi. Bütün bu cinayətlər Avropa Komissiyasının sədr müavini Cozef Borrelin bağ adlandırdığı Avropanın özünü demokratik hesab edən ölkəsi Fransada baş verir. Avropanı bağ, dünyanın qalan hissəsini cəngəllik adlandıran bu şəxsin dedikləri dünya siyasətinin “kimlərin əlində qaldığını” aydın göstərir. Belə düşüncə sahiblərinin rəhbərlik etdikləri təşkilatlarla birgə addımlamağa dəyərmi? Cavabını dövlətimizin başçısı özü verdi: “Əgər biz cəngəllikiksə, onda bizdən kənar durun və işlərimizə qarışmayın”.
Bölmənin digər xəbərləri
