Novruz yarmarkaları fəaliyyətə başlayıb FOTO
Bakı, 13 mart, Rauf Hacıyev, AZƏRTAC
Novruz bayramı ilə əlaqədar olaraq martın 13-dən 19-dək Kənd Təsərrüfatı Nazirliyinin tabeliyindəki “Aqrar Tədarük və Təchizat” ASC tərəfindən “Kənddən şəhərə” yarmarkaları təşkil olunub.
Yarmarkalar paytaxtın Nərimanov rayonu, Fətəli xan Xoyski küçəsi, 5 (metronun “Gənclik” stansiyasının çıxışı), Binəqədi rayonu, Süleyman Sani Axundov, 5B (“İnqilab” kinoteatrının yanı) və Xırdalan şəhəri, Heydər Əliyev prospekti, 41A ünvanlarında açılıb.
AZƏRTAC-ın müxbiri metronun “Gənclik” stansiyasının çıxışında təşkil edilən Novruz yarmarkasında olub, satıcı və alıcılarla söhbət edib.
Yarmarkanın girişində məhsulların qiymətlərini əks etdirən lövhə qoyulub. Bu qiymətlər piştaxtalarda da əks olunub. Burada koronavirus əleyhinə quraşdırılan dezinfeksiyaedici məhlullar da diqqətimizdən qaçmadı. Hər bir müştərinin hərarəti yoxlanılır, əlləri dezinfeksiya edilir və bundan sonra tibbi maska taxmaqla yarmarkaya girişinə icazə verilir.
Fermerlərə isə ödənişsiz dezinfeksiyaedici məhlullar paylanılıb, tibbi maskalarla təmin olunublar. Həmçinin gündə 2-3 dəfə fermerlərin hərarətləri təkrar yoxlanılır.
“Kənddən şəhərə” Novruz yarmarkalarında satışa çıxarılan məhsullar tamamilə yerli istehsaldır və müxtəlif regionlarda fəaliyyət göstərən, yarmarkada iştirak üçün əvvəlcədən qeydiyyatdan keçən fermerlər tərəfindən alıcılara təqdim edilir. Yarmarkada 30-dan artıq regiondan 100-dən çox fermer 60-a yaxın çeşiddə kənd təsərrüfatı və qida məhsulunun satışını həyata keçirir.
Belə fermerlərdən biri İsmayıllıdan gələn Şahmar Əliyevdir. O, fermerlər üçün yaradılan şəraitdən razılığını bildirərək deyib: “İlin ilk Novruz yarmarkasıdır, həm də ki, hələ çoxlarının bu yarmarkalardan xəbəri yoxdur. Növbəti günlərdə müştərilərimiz daha çox olacaq. Qiymətlərimiz də münasibdir, müştəri razı qalır. Bir sözlə, alan razı, satan razı”.
Qiymətlərə gəldikdə, yarmarkada şabalıd 4, qoz ləpəsi 8, fındıq ləpəsi 13, kartof 0.45, soğan 0.60, mandarin 2, portağal 1.70, alma 0.40, pomidor 1, xiyar 2.50, kənd çolpası 3.50, mal əti 9.50, quzu əti 12.50 manatdan başlayan qiymətlərə təklif olunur. Bu qiymətlər pərakəndə satış məntəqələri ilə müqayisədə məhsullardan asılı olaraq 20-30, bəzən də 40-50 faiz aşağıdır. Bu da alıcıların ürəyincədir. Söhbət etdiyimiz Bakı sakini Qasım Ələkbərov deyir ki, belə yarmarkalar hər il təşkil olunur. “Sağ olsun dövlətimiz, bu yarmarkaları təşkil etməklə, həm biz alıcılara münasib şərait yaradır ki, məhsulları ucuz qiymətə alaq, həm də fermerlərin özləri üçün yaxşıdır. Axı, bu yarmarkalarda məhsulu müştəriyə elə fermerin özü satır. Amma digər satış yerlərində belə deyil, ona görə də məhsulun qiyməti də yüksək olur”.
Digər müştəri Nərgiz Məmmədova da qiymətlərdən razılıq edir. Deyir ki, başqa yerlərlə müqayisədə bu yarmarkalarda məhsullar daha ucuz olur. “Həm də bilirsən ki, aldığın əsl kənd məhsuludur, hər hansı qatqısı yoxdur. Qabaqdan Novruz bayramı gəlir, hər kəs bayram hazırlığı görür. Mən də gəlmişəm ki, lazım olan çərəzlərdən, meyvələrdən alım”, - deyə o vurğulayıb.
Yarmarkada qiymətləri fermerlər özləri təyin edirlər və bu şərait onlara ödənişsiz yaradılıb. Bu barədə danışan “Aqrar Tədarük və Təchizat” ASC-nin nümayəndəsi Mayis Musayev deyib ki, fermerlərə məhsulların münasib qiymətə satılması tövsiyə edilib.
Onun sözlərinə görə, Bakı və Abşeron ərazisində üç fərqli ünvanda gündəlik keçiriləcək yarmarkanın təşkilində əsas məqsəd bayram günlərində vətəndaşların kənd məhsullarına artan tələbatlarını yerli və sağlam məhsullarla qarşılamaq, yerli fermerlər üçün alternativ satış kanalı təşkil etməkdir. Vətəndaşlar Novruz yarmarkalarından kənd təsərrüfatı məhsullarını sərfəli qiymətə elə fermerlərin özündən alacaqlar.
“Novruz yarmarkası karantin rejiminin tələblərinə uyğun təşkil olunub. Fermerlər əvvəlcədən tibbi müayinədən keçirilib, ödənişsiz şəkildə piştaxta, tərəzi və digər avadanlıqlarla yanaşı, tibbi ləvazimatlarla təmin olunublar. Həmçinin yarmarkanın keçiriləcəyi müddətdə təşkilatçı qurum tərəfindən yarmarka ərazisində mütəmadi olaraq dezinfeksiya işləri aparılacaq və ziyarətçilərin sosial məsafəni qorumasına ciddi nəzarət olunacaq”, - deyə Mayis Musayev bildirib.
“Aqrar Tədarük və Təchizat” ASC-nin nümayəndəsi, həmçinin qeyd edib ki, gələcəkdə yarmarkaların sayının artırılması istiqamətində də müvafiq iş aparılır. Yarmarkanın sayının az olması isə pandemiyanın yaratdığı çətinliklərlə bağlıdır.
Qışda təşkil edilən yarmarkalarda fermerlərin sayının az olmasına gəldikdə, Mayis Musayev bunu məhsul yığımı mövsümü olmaması ilə əlaqələndirib. “Ümumiyyətlə, hər il yaz-yay-payız aylarında yarmarkalarda iştirak edən fermerlərin sayı çox olur, qış aylarında isə müəyyən azalma qeydə alınır ki, bu da məhsul yığımı mövsümü ilə əlaqədardır”.
Bölmənin digər xəbərləri
