İQTİSADİYYAT
NOYABR AYINDA AZƏRBAYCAN ENERGETİKLƏRİ 1,707 MİLYARD KİLOVAT-SAAT ELEKTRİK ENERJİSİ İSTEHSAL ETMİŞLƏR
“Azərenerji” SC-nin mətbuat xidmətindən AZƏRTAC-a bildirmişlər ki, Noyabr ayında şirkətdə 1,707 milyard kilovat-saat elektrik enerjisi istehsal edilmişdir. Bunun 1,527 milyard kilovat-saatı istilik, 180 milyon kilovat-saatı isə su elektrik stansiyalarının payına düşür.
Elektrik enerjisinin istehsalı ötən ilin müvafiq ayına nisbətən 3 faiz, istehlakı isə 6 faiz artmışdır. Energetiklər bunu hazırkı sərt hava şəraiti ilə, eləcə də əhalinin əksəriyyəti üçün əsas istilik mənbəyi olan elektrik qızdırıcı cihazlarından daha çox istifadə edilməsi ilə əlaqələndirirlər.
Ay ərzində qonşu dövlətlərlə - Rusiya, İran və Türkiyə ilə planlı elektrik enerjisi mübadiləsi də davam etdirilmişdir.
Ümumiyyətlə, isə cari ilin 11 ayı ərzində “Azərenerji” SC-nin müəssisələri 16,483 milyard kilovat-saat elektrik enerjisi hasil etmişdir ki, bu da 2001-ci ilin müvafiq göstəricisindən 499 milyon kilovat-saat azdır.