Numan Kurtulmuş: Trampın Qəzza sektoru üzrə planı real olmayan arzudur
Ankara, 6 fevral, AZƏRTAC
Türkiyə Böyük Millət Məclisinin (TBMM) sədri Numan Kurtulmuş ABŞ Prezidenti Donald Trampın Fələstin-İsrail nizamlanması ilə bağlı son təşəbbüslərini real olmayan arzu adlandırıb.
Numan Kurtulmuş Ankarada Bəhreyn nümayəndə heyəti ilə görüşdə deyib: “Trampın Qəzza planı boş bir xəyaldır. Dünyada heç bir qüvvə Fələstin torpaqlarını fələstinlilərdən təmizləməyə müvəffəq olmayacaq”.
Türkiyə parlamentinin sədri qeyd edib ki, Ağ ev rəhbərinin təklifləri irrasionaldır və beynəlxalq hüquq normalarına, hamı tərəfindən tanınmış insan hüquqlarına ziddir.
O, Fələstin və İsrail arasındakı münaqişənin həllinin yeganə yolunun “iki xalq üçün iki dövlət” prinsipindən keçdiyini vurğulayıb.
TBMM-nin sədri Qəzza zolağında uzunmüddətli atəşkəsə çağıraraq deyib: “Fələstin torpaqları fələstinlilərin vətəni olub və belə də qalacaq”.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
