SİYASƏT
Oleq Krapivin yenidən yekdilliklə Ukrayna Azərbaycanlılar Konqresinin Kiyev şəhər təşkilatının sədri seçilmişdir
Kiyev, 14 mart (AZƏRTAC). Ukrayna paytaxtında Ukrayna Azərbaycanlılar Konqresinin (UAK) Kiyev şəhər təşkilatının (KŞT) hesabat-seçki konfransı keçirilmişdir.
UAK Kiyev şəhər Təşkilatının sədri, “Azərbaycançılıq İnstitutu” Beynəlxalq İctimai Təşkilatının prezidenti, Azərbaycanın və keçmiş SSRİ-nin Əməkdar İdman Ustası, Azərbaycanın və keçmiş SSRİ-nin Əməkdar Məşqçisi Oleq Krapivin UAK-ın Kiyev şəhər təşkilatının 2011-ci ildəki fəaliyyəti barədə hesabat məruzəsi ilə çıxış etmişdir.
Hesabat dövründə UAK-ın Kiyev şəhər təşkilatı genişmiqyaslı layihələr həyata keçirmişdir, məsələn, yeni bazar günü Azərbaycan məktəbləri, dörd məktəbdə Azərbaycan dili sinifləri açılmış, orada vətənpərvərlik xarakterli müxtəlif tədbirlər həyata keçirilmiş, Azərbaycanın dövlət bayramları qeyd edilmişdir. 2011-ci ildə Kiyevdə Azərbaycan xalqının ümummilli lideri Heydər Əliyevin xatirəsinə həsr edilmiş sərbəst güləş üzrə III beynəlxalq turnir keçirilmişdir. UAK-ın Kiyev şəhər təşkilatının təşəbbüsü ilə Kiyev Şəhər Dövlət Administrasiyasının Təhsil İdarəsi ilə Bakı şəhəri İcra Hakimiyyətinin müvafiq təşkilatı arasında sıx tərəfdaşlıq münasibətləri yaradılmış, Kiyev nümayəndə heyəti Azərbaycan paytaxtına səfər etmiş, səfər müddətində ikitərəfli əməkdaşlıq haqqında müqavilə imzalanmışdır.
Kiyevdəki azərbaycanlı gənclərin həftədə üç dəfə Kiyev Bədən Tərbiyəsi və İdman Universitetinin idman zalında sərbəst güləş seksiyalarında pulsuz məşğul olmasına imkan yaradılmışdır. Sadalanan bütün tədbirlərin keçirilməsi Oleq Krapivinin şəxsi vəsaiti hesabına maliyyələşdirilir.
Konfransda çıxış edən hacı Şakir (Yəhyayev) O.Krapivinin vətənpərvər və səxavətli bir insan olmasını vurğulamış, Çernobıl AES-də qəzanın ləğv edilməsində iştirak etmiş, hazırda Kiyevdə yaşayan azərbaycanlılara maddi yardım göstərdiyinə görə təşəkkür etmişdir.
Valideyn komitəsinin sədri Teymur Teymurov da Ukrayna paytaxtında fəaliyyət göstərən Azərbaycan bazar günü məktəblərinin daim dəstəklənməsinə görə O.Krapivinə dərin təşəkkürünü bildirmişdir.
Sahibkar Vilayət Quliyev, Fail Abidov və başqaları da hesabat dövründə UAK-ın Kiyev şəhər təşkilatının və onun sədrinin uğurlu fəaliyyəti barədə söhbət açmışlar.
Sonra keçirilmiş səsvermədə Oleq Andreyeviç Krapivin yenidən yekdilliklə UAK-ın Kiyev şəhər təşkilatının sədri seçilmişdir. S.Qədiməliyev UAK-ın Kiyev şəhər təşkilatının sədrinin birinci müavini, F.Abidov və A.Quliyev sədrin müavinləri seçilmişdir.
Konfransın gündəliyinə daxil edilmiş başqa məsələlərə - UAK-ın Kiyev şəhər təşkilatının Kiyevdəki yeni hüquqi ünvanı və ofisi, Novruz bayramına hazırlıq və onun keçirilməsi məsələlərinə də baxılmışdır.
Zeynal Ağazadə
AZƏRTAC-ın xüsusi müxbiri
Kiyev