“OLİMPİYA DÜNYASI” QƏZETİNİN BİR YAŞI TAMAM OLDU
Azərbaycan Milli Olimpiya Komitəsinin mətbu orqanı - “Olimpiya dünyası” qəzeti ilk nömrəsindən başlayaraq, respublikamızın idman həyatını işıqlandıran kütləvi nəşrlərdən biri kimi tanınmışdır.
Qəzetin birinci ildönümü münasibətilə buraxılmış nömrəsində MOK-un prezidenti İlham Əliyevin təbrik məktubu dərc edilmişdir. Məktubda deyilir ki, ötən bir il ərzində qəzet öz səhifələrində mühüm idman hadisələrini müntəzəm və operativ şəkildə işıqlandırmaqla, bütövlükdə ölkənin idman ideologiyasının carçısına çevrilmişdir. Təbrikdə belə bir inam ifadə olunur ki, MOK-un mətbu orqanı ölkəmizdə kütləvi idmanın inkişafına, sağlam həyat tərzinin, olimpiya hərəkatının təbliğinə bundan sonra da layiqli kömək göstərəcək, bütün idmançıların, idmansevərlərin sevimli nəşrinə çevriləcəkdir.
Bayram nömrəsində qəzetin jurnalistlərini idman federasiyalarının prezidentləri Abbas Abbasov (güləş), Kəmaləddin Heydərov (taekvondo), Cahangir Əsgərov (ağır atletika), gənclər, idman və turizm naziri Əbülfəz Qarayev, Milli Paralimpiya Komitəsinin prezidenti İlqar Rəhimov da təbrik etmişlər.
Qəzetin bu nömrəsində idmançılarımızın - dəfələrlə Avropa və dünya birinciliklərinin mükafatçısı Nizami Paşayevin ağır atletika üzrə dünya çempionatında və Eltac Səfərlinin dünya şahmat çempionatında qazandıqları uğurlar barədə də məlumat verilmişdir.
“Olimpiya dünyası” qəzetini təbrik edir və onun hər nömrəsində Azərbaycan idmançılarının qələbələrindən söhbət açılmasını arzulayırıq.
Bölmənin digər xəbərləri
