ÖLKƏMİZİN HƏMKARLAR İTTİFAQLARI FƏALLARI RESPUBLİKA GÜNÜNÜ QEYD ETMİŞLƏR
Ölkəmizin həmkarlar ittifaqları fəallarının iştirak etdiyi yığıncaqda AHİK sədrinin birinci müavini İ.Əliyev çıxış edərək Azərbaycanın müstəqillik tarixindən, zamanın çətin sınaqlarına mətanətlə sinə gərməsindən, son on ildə ümummilli liderimiz Prezident Heydər Əliyevin suverenliyimizin möhkəmləndirilməsi, yeni dövlət quruculuğu, möhkəm sosial-siyasi sabitliyin yaradılması, respublikamızın beynəlxalq aləmdə nüfuzlu yer tutması, qısa vaxt ərzində yüksək iqtisadi tərəqqiyə nail olunması sahəsində misilsiz xidmətlərindən danışmış, ulu öndərimizin müəyyənləşdirdiyi siyasi xəttin Prezident İlham Əliyev tərəfindən uğurla davam etdirildiyini diqqətə çatdırmışdır.
Yığıncaqda çıxış edən digər natiqlər də müstəqilliyimizin əbədiliyinə, dövlətimizin daha da inkişaf edib möhkəmlənəcəyinə, xalqımızın dünya sivilizasiyasına yeni töhfələr verəcəyinə qəti inamlarını ifadə etmişlər.
