Ötən il Azərbaycana 22 minə yaxın küveytli turist səyahət edib
Bakı, 9 mart, AZƏRTAC
Ötən il 22 minə yaxın Küveyt vətəndaşı Azərbaycana səyahət edib. Cari ildə iki dost ölkə arasında turizm sektorunda əlaqələrin daha da inkişaf etməsi gözlənilir. Son illər ərəb ölkələri, o cümlədən Küveytə aviareyslərin daha da intensiv olması turizm sektorunda canlanmanı şərtləndirən əsas amillərdən biri olub.
AZƏRTAC xəbər verir ki, bu məlumatı Azərbaycanın Küveytdəki səfiri Emil Kərimov bu ölkənin ən nüfuzlu qəzetlərindən biri olan “Əl Ənbə” nəşrinin baş redaktoru Yusif Xalid Al-Marzuq və jurnalistlərlə keçirdiyi görüşdə verib. Küveyt mediasının ölkəmizə böyük maraq göstərdiyini qeyd edən diplomatımız vurğulayıb ki, Azərbaycan Prezidenti İlham Əliyevin Sərəncamına əsasən, bu il dahi şəxsiyyət, xalqımızın Ümummilli Lideri Heydər Əliyevin 100 illiyi qeyd olunur. O əlavə edib ki, bu münasibətlə Küveytdə də bir sıra tədbirlər keçiriləcək və media nümayəndələri ilə birlikdə məqalələr dərc ediləcək.
Səfir Azərbaycan və Küveyt arasında iqtisadi-ticarət, mədəni əməkdaşlıqdan da ətraflı bəhs edib.
Görüş zamanı “Əl Ənba” qəzeti ilə səfirlik, habelə azərbaycanlı jurnalistlər arasında əlaqələrin daha da möhkəmlənməsi müzakirə edilib, küveytli jurnalistlərin sualları cavablandırılıb.
Sonda qəzetin baş redaktoruna Azərbaycanın tarixi və turizm məkanlarını əks etdirən nəşrlər təqdim edilib.
Bölmənin digər xəbərləri
