Ötən il Naxçıvanda test imtahanı ilə dövlət qulluğuna 167 vakant vəzifəyə təyinat olub
Naxçıvan, 11 yanvar, AZƏRTAC
Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə komissiya vətəndaşların dövlət qulluğuna qəbulunu mərkəzləşdirilmiş qaydada müsabiqə yolu ilə və şəffaflıq əsasında həyata keçirir.
AZƏRTAC xəbər verir ki, komissiya tərəfindən ötən il dövlət orqanlarında 642 vakant vəzifənin tutulması məqsədilə elan olunmuş müsabiqənin test imtahanında iştirak edən 722 namizəddən 389-u müvəffəqiyyət qazanıb, onlardan 167-si vakant vəzifələrə təyin olunub. Ötən il komissiyada 64 namizəd tərəfindən vakant aparat rəhbəri, şöbə müdiri və sektor müdiri vəzifələrinin tutulması üçün test imtahanları keçirilib, onlardan 22 nəfəri müvəffəqiyyət qazanıb.
Qanunvericiliyə uyğun olaraq test imtahanlarında uğur qazanmış 394 nəfərə sertifikatlar verilib. Həmçinin müvafiq dövlət orqanlarında 25 dövlət qulluqçusu tərəfindən vakant dövlət qulluğu vəzifələrinin tutulması üçün keçirilən daxili müsahibələrdə komissiyanın nümayəndəsinin iştirakı təmin edilib.
Ötən il ehtiyat kadrlarla işin təşkili diqqətdə saxlanılıb, ehtiyat kadrlar siyahısında olan 5 namizəddən 1-i vakant vəzifəyə təyin olunub.
Bölmənin digər xəbərləri
