Otman Bozdağ palçıq vulkanında baş vermiş püskürmənin aktivliyi dayanıb
Bakı, 11 oktyabr, AZƏRTAC
Bakı şəhəri Qaradağ rayonu ərazisində yerləşən, Bakı və Abşeron yarımadasının palçıq vulkanları qrupu Dövlət Təbiət Qoruğuna daxil olan Otman Bozdağ palçıq vulkanında baş vermiş püskürmənin aktivliyi hazırda dayanıb.
AZƏRTAC xəbər verir ki, vulkan püskürməsi oktyabrın 11-i saat 08:27-də baş verib. Hadisə güclü alovlanma ilə müşayiət olunub. İlkin hesablamalara görə, yer səthinə çıxan brekçiyanın yayıldığı ərazi təxminən 4 hektar, orta qalınlığı 1,5 metr, həcmi isə təxminən 60 min kubmetr təşkil edir.
Püskürmə sahəsi boyunca konsentrik çatlar müşahidə olunur. Ekologiya və Təbii Sərvətlər Nazirliyinin, Elm və Təhsil Nazirliyinin Geologiya və Geofizika İnstitutunun əməkdaşları ərazidə birgə monitorinqləri davam etdirirlər.
Xatırladaq ki, aktiv palçıq vulkanlarından hesab edilən Otman Bozdağ palçıq vulkanında son püskürmə 2018-ci il sentyabrın 23-də qeydə alınıb.
Bölmənin digər xəbərləri
