“Özəl sektorun inkişafı və texniki peşə təhsili və təlimi” layihəsinin yekun konfransı
Bakı, 14 mart, AZƏRTAC
Almaniya Beynəlxalq Əməkdaşlıq Cəmiyyəti tərəfindən həyata keçirilən Cənubi Qafqazda “Özəl sektorun inkişafı və texniki peşə təhsili və təlimi” proqramının Azərbaycan komponenti üzrə yekun konfrans təşkil olunub.
Peşə Təhsili üzrə Dövlət Agentliyindən AZƏRTAC-a verilən məlumata görə, konfransda İqtisadiyyat Nazirliyi, Elm və Təhsil Nazirliyi, Rəqəmsal İnkişaf və Nəqliyyat Nazirliyi, Kənd Təsərrüfatı Nazirliyi, Azərbaycan Respublikası Əmək və Əhalinin Sosial Müdafiəsi Nazirliyi, Dövlət Turizm Agentliyi / Azərbaycan Turizm Bürosu, Kiçik və Orta Biznesin İnkişafı Agentliyi, Peşə Təhsili üzrə Dövlət Agentliyi, Dövlət Məşğulluq Agentliyi, Aqrar İnnovasiyalar Mərkəzi, Nəqliyyat Təlim-Tədris Mərkəzi və bir sıra digər dövlət qurumları və beynəlxalq təşkilatlar iştirak ediblər.
Qeyd edilib ki, Azərbaycanda 383 mikro, kiçik və orta müəssisə və startapı əhatə edən layihə mühüm nəticələr əldə edib. 7 uzunmüddətli və 14 qısamüddətli, səriştə əsaslı peşə ixtisasları hazırlanıb, 600-dən çox tələbə duala bənzər kurslara daxil olub, 296 tələbə işlə təmin olunub, 373 müəllim təlim keçib və 177 özəl müəssisə peşə təhsili müəssisələri ilə əməkdaşlıq qurulub.
Tədbirdə, həmçinin özəl sektorun və texniki peşə təhsilinin inkişafı istiqamətində görülən işlər haqqında fikir mübadiləsi aparılıb.
Cənubi Qafqazda “Özəl sektorun inkişafı və texniki peşə təhsili və təlimi” (PSD TVET SC) proqramı Almaniyanın İqtisadi Əməkdaşlıq və İnkişaf üzrə Federal Nazirliyi (BMZ) tərəfindən və Avropa İttifaqı ilə birgə maliyyələşdirilib və Alman Beynəlxalq Əməkdaşlıq Cəmiyyəti (GIZ) tərəfindən 2017-2023-cü illər ərzində Cənubi Qafqazın üç ölkəsində həyata keçirilib. Proqram turizm, kənd təsərrüfatı, logistika və nəqliyyat sektorlarına hədəflənərək dayanıqlı iqtisadi inkişaf üçün şəraitin yaxşılaşdırılması məqsədini daşıyıb.
Bölmənin digər xəbərləri
