Pan Gi Mun iqlim üzrə danışıq iştirakçılarını kompromisə çağırıb
Bakı, 5 noyabr, AZƏRTAC
Nyu-Yorkda BMT-nin mənzil-qərargahında iqlim dəyişikliyi üzrə müqavilənin hazırlığına həsr edilən tədbir keçirilib. Bu sənəd dekabr ayında Parisdə imzalanacaq.
AZƏRTAC BMT-nin Xəbərlər Mərkəzinə istinadla bildirir ki, tədbirdə BMT-nin Baş katibi Pan Gi Mun çıxış edib. O deyib ki, dünyanın bütün ölkələrindən insanlar istixana qazlarının azaldılması üzrə cəhdlərə fəal qoşulublar. Lakin diplomatlar hələ də “yaşıl” gələcək qurulmasının yolları barədə razılığa gəlmirlər.
BMT-nin Baş katibi xatırladıb ki, “dünya iqlim üzrə universal razılaşmanın əldə edilməsi üçün olduqca qısa vaxt qoyub. Bu müddət dörd həftədən sonra başa çatır”. Pan Gi Mun qeyd edib ki, Parisdə iqlim üzrə keçiriləcək konfransı nikbinliklə gözləyir. O deyib: “Həyatımızın hər sahəsində və planetimizin hər guşəsində müşahidə edirik ki, insanlar zərərli istixana qazlarının emissiyalarının ixtisarı və davamlı iqlim gələcəyinin qurulması istiqamətlərində fəal iştirak edirlər. İqlim dəyişikliyi üzrə fəaliyyətlərin qlobal dəstəklənməsi məndə dərin təəssürat oyatdı. Dünya istəyir ki, bu impuls danışıqlar zamanı da olsun”.
Onun sözlərinə görə, danışıqların çox aylardır aparılmasına baxmayaraq, mühüm məsələlər hələ də müzakirə mərhələsindədir. Bu məsələlərin sırasında bərabər və fərqli məsuliyyətə, maliyyələşdirməyə və niyyətlərə aid əsasnaməni qeyd etmək olar. Bu barədə danışıqların iştirakçıları rəhbərlərindən dəqiq göstərişlər almalıdırlar.
BMT-nin Baş katibi bildirib ki, qarşıdan gələn dörd həftədə dövlət və hökumət başçılarına zəng edəcək və onlardan danışıqlar prosesinə müdaxilə etməyi xahiş edəcək. O deyib: “Mən dünya liderlərini danışıqlarda iştirak edən nümayəndələrinə “kompromis və konsensus zamanını yetişibdir” söyləməyə çağıracağam”.
Pan Gi Mun məlumat verib ki, oktyabrın 1-nə 155 ölkə iqlim üzrə milli planlarını təqdim edib. İstixana qazlarının havaya buraxılmasının 90 faizindən çoxu bu ölkələrin payına düşür. O, qalan ölkələri Paris konfransınadək milli planlarını təqdim etməyə çağırıb.
O deyib: “Bu, təhlükəsiz, sağlam və çiçəklənən gələcəyin qurulması üçün ilk addımdır. Bu planlar 2030-cu ilədək davamlı inkişafın məqsədlərinin həyata keçirilməsini sürətləndirməyə kömək edəcək. Bunlar bizim son məqsədimizə - havanın temperaturunun 2 dərəcə Selsidən çox yüksəlməsinə yol verməməyə doğru hərəkətimizin başlanğıcıdır”.
Bölmənin digər xəbərləri
