Panel: Mənzil təminatı şəhərləri bir araya gətirdikdə: Praktikada yerli əməkdaşlıq
Bakı, 21 may, AZƏRTAC
BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində mayın 21-də "Mənzil təminatı şəhərləri bir araya gətirdikdə: Praktikada yerli əməkdaşlıq" adlı panel sessiyası keçirilib.
AZƏRTAC xəbər verir ki, Belçika İnkişaf Agentliyində (ENABEL) yerli idarəetmə üzrə mütəxəssis Odai Əlcəbərinin moderatorluğu ilə keçirilən tədbirdə sahə üzrə beynəlxalq mütəxəssislər, dövlət qurumlarının və bələdiyyə assosiasiyalarının nümayəndələri iştirak ediblər.
Sessiyada çıxış edən natiqlər bildiriblər ki, mənzil təminatı ilə bağlı çətinliklər təkcə təklif (mənzil sayının azlığı) məsələsi deyil, buraya həmçinin idarəetmə, maliyyələşdirmə, davamlılıq və ümumilikdə şəhər həyatının keyfiyyəti də daxildir. Tədbirdə mərkəzləşdirilməmiş əməkdaşlığın — xüsusilə də bələdiyyə assosiasiyaları vasitəsilə -mövcud boşluqları doldurmağa kömək edən praktiki infrastruktur rolunu necə oynaya biləcəyi ətrafında müzakirələr aparılıb.
Eyni zamanda, mənzil təminatı ilə bağlı mövcud əməkdaşlıq modellərinin qorunması və real nəticələr verməsi, yeni tərəfdaşlıqlara olan ehtiyaclar nəzərdən keçirilib. Qeyd olunub ki, inteqrasiya olunmuş şəhərsalma yanaşmaları - o cümlədən yaşıl ictimai məkanlara və inklüziv məhəllələrə qoyulan investisiyalar daha dözümlü və yaşana bilən şəhərlərin qurulmasına mühüm töhfə verə bilər.
Bölmənin digər xəbərləri
