Paris merinin biznes-klas səfərləri: şəffaflıq və etika çatışmazlığı qalmaqalı
Paris, 17 noyabr, AZƏRTAC
Paris meri Ann İdalqo yenidən beynəlxalq səfərləri ilə bağlı qalmaqalın mərkəzinə düşüb. “Mediapart” və “Le Point”in açıqladığı məlumatlar göstərir ki, İdalqo son illərdə ölkə xaricinə tez-tez biznes-klasla səyahət edib, bu isə Paris meriyasının qənaət və şəffaflıq öhdəlikləri ilə açıq ziddiyyət təşkil edir. Problemin mahiyyəti yalnız xərclərin yüksək olmasında deyil, əsas mübahisə səfərlərin Paris Şurasının adi nəzarət mexanizmlərindən kənarda, merin şəxsi qərarı ilə təsdiqlənməsidir. Bu isə idarəetmə etikası və demokratik nəzarət baxımından ciddi suallar doğurur.
AZƏRTAC xəbər verir ki, “Mediapart” və “Le Point”in araşdırmalarına görə, İdalqo son illərdə təxminən iyirmi dəfə ölkə xaricinə biznes-klassla səyahət edib. Merin komandası bunu təhlükəsizlik səbəbləri ilə əsaslandırır, lakin Paris meriyasının qənaət öhdəlikləri fonunda bu arqument ictimaiyyət və müxalifət üçün inandırıcı deyil. Halbuki Paris meriyasının 2017-ci il etika məsləhətçisi İdalqonun biznes-klas ilə səyahət etmədiyini açıqlamışdı. Hazırkı praktikalar bu bəyanatla açıq şəkildə ziddiyyət təşkil edir, merin şəffaflıq və etik öhdəliklərinə dair şübhələri artırır.
219 min avroluq xərclər və 2023-cü ilin qayda dəyişikliyi
Qalmaqalı daha da dərinləşdirən element 2023-cü ildə qəbul edilmiş yeni qaydadır. Qaydaya görə, Paris merinin beynəlxalq səfərlərinə əvvəlki kimi Şəhər Şurası yox, yalnız birinci müavin Patryk Bloş istisna hal olaraq icazə verir. Bu mexanizm Fransanın digər şəhərlərindəki standart nəzarət prosedurlarından fərqlənir və mer üçün faktiki istisna yaradır. Nəticədə merin səfərlərinin məqsədi və xərcləri barədə məlumat yalnız məhdud sayda məsləhətçiyə açıqlanır. Şura üzvlərinin əksəriyyəti isə bu səfərlərdən yalnız sonradan, Paris Şurasının iclaslarında xəbərdar olurlar. Bu isə demokratik nəzarət və şəffaflıq prinsiplərinin kobud şəkildə pozulmasıdır.
“Transparence Citoyenne” adlı vətəndaş təşkilatı sentyabrın 8-də meriyaya göndərdiyi məktubda bildirib ki, 2020-ci ildən bəri İdalqonun 79 səfərinə ümumilikdə 219 min 64 avro xərclənib, bunun 97 faizini xarici səfərlərə aiddir. Təşkilat meriyadan xərclərin əsaslandırılmasını tələb edib, qanunsuzluq aşkarlanacağı halda inzibati məhkəmənin xərclərin geri ödənilməsini tələb edə biləcəyini xatırladıb. Lakin iki ay keçməsinə baxmayaraq, meriyadan hələ də cavab yoxdur, bu isə ictimai etimadın ciddi şəkildə sarsıldığını göstərir.
Siyasi təzyiq və etimad böhranı
Bu qalmaqal İdalqo üçün davam edən siyasi çətinliklərin yalnız bir hissəsidir. “Mediapart”ın əvvəllər açıqladığı hesab-fakturalar və səfərlərin qeyri-şəffaf aparılması Paris meriyasına qarşı ictimai etimadı zəiflədir. Siyasi təhlilçilər bildirirlər ki, bu məsələnin böyüməsi meriyanın idarəetmə etikasına dair ciddi suallar doğurur və gələcək bələdiyyə müzakirələrində əsas mövzulardan biri olacaq.
Analitik baxımdan, İdalqonun qərar mexanizmi bir tərəfdən təhlükəsizlik ehtiyacını əsaslandırsa da, digər tərəfdən demokratik nəzarət və şəffaflıq prinsiplərini kobud şəkildə pozur. Bu, Paris meriyasının maliyyə məsuliyyəti və etik standartlarını ciddi şəkildə gözdən keçirməsinə ehtiyac olduğunu açıq şəkildə göstərir.
Bölmənin digər xəbərləri
