PARİSDƏ NƏQLİYYAT İŞÇİLƏRİNİN İCLASI
Parisdə İqtisadi Əməkdaşlıq və İnkişaf Təşkilatının binasında Avropa Nəqliyyat Nazirləri Konfransının (ANNK) iclası keçirilmişdir. İclasda nəqliyyat vasitələrinin təhlükəsizliyinin təmin edilməsi məsələsi müzakirə edilmişdir. ANNK üzvü olan ölkələrin və bir sıra beynəlxalq qurumların nümayəndələrinin iştirak etdiyi iclasda ölkəmizi “Azəravtonəqliyyat” Konserninin prezidenti Hüseyn Hüseynov, konsernin müfəttişlik və lisenziyalar idarəsi rəisinin müavini A.Şıxəliyev və Azərbaycan Respublikasının Fransadakı səfirliyinin iqtisadi məsələlər üzrə müşaviri İ.Əhmədov təmsil etmişlər.
ANNK Nazirlər Şurasının Buxarest toplantısının qərarlarının yerinə yetirilməsi ilə bağlı məsələ müzakirə olunarkən H.Hüseynov çıxış edərək ölkəmizin ərazisinin Ermənistan Silahlı qüvvələri tərəfindən işğalı ilə əlaqədar yaranmış vəziyyət barədə məlumat vermiş, işğal olunmuş ərazilərdə fəaliyyət göstərən erməni quldur dəstələrinin nəqliyyat vasitələrinin bu bölgədə hərəkətləri üçün ciddi təhlükə yaratdığını qeyd etmişdir.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
