Bakı, 13 may, AZƏRTAC

“Pegasus Airlines” türk aviaşirkətinin martın 18-dən Azərbaycanda uçuşlara başlaması xəbəri çoxlarını sevindirdi: bazarda “lou-kost” seqmentində daha bir aviadaşıyıcının görünməsi qiymətlərə əlverişli şəkildə təsir etmə və uçuş istiqamətləri seçiminin genişləndirməsini vəd edir. Maraqlısı budur ki, dünyanın ən tanınmış turizm məkanlarından olan İstanbula uçuşlar Bakıdan yox, populyar turist şəhəri Qəbələdən həyata keçirilir, oradan da tranzitlə dünyanın dörd bir yanına uçmaq olar.

Biz “Pegasus Airlines” aviaşirkəti, onun özəllikləri və Azərbaycandan olan sərnişinlərin şirkətdən nələri gözləyə biləcəyi ilə maraqlanmaq qərarına gəldik.

Qəbələ üstəgəl Avropa

Əvvəlcə Qəbələdən həyata keçirilən reyslər haqqında. Hazırda Qəbələ beynəlxalq hava limanından İstanbuldakı Səbihə Gökçən hava limanına, oradan da bütün dünyaya 54 istiqamətdə uçuşlar həftədə üç dəfə həyata keçirilir. Bu uçuşların xəritəsinə populyar türk kurort şəhərləri Bodrum, İzmir, Antalya, Dalamar və başqaları (ümumən Türkiyə üzrə 13 istiqamətdə), Misirin Şarm əş-Şeyx və Hurqada kurortları, Şimali Kipr və əksər Avropa ölkələri daxildir. “Pegasus Airlines” Qəbələni hava körpüsü ilə Amsterdam, Berlin, London, Madrid, Praqa, Roma, Milan, Paris, Oslo və digər məşhur turizm şəhərləri ilə birləşdirir. Bişkekdəki “Manas” beynəlxalq hava limanı ilə əməkdaşlıq sayəsində Hindistan kimi ekzotik istiqamətə uçuşlar həyata keçirmək imkanı da var.

Görəsən, Qəbələ uçuş gediş-gəliş yeri kimi təsadüfən seçilibmi? “Pegasus Airlines”in saytındakı məlumata əsasən, heç də yox. Aviaşirkətin rəsmi internet saytında yerləşdirilən press-relizdə Qəbələ xarici turistlər üçün Azərbaycanda ən məşhur səyahət yerlərindən biri kimi təqdim olunur. Məlumatda bölgənin təbii gözəllikləri, tarixi yerləri, nəfis milli mətbəxi, mədəni irsi, o cümlədən hər il keçirilən Beynəlxalq Musiqi Festivalı, eləcə də tanınmış əyləncə parkı “Gabaland” ailəvi istirahət yeri kimi qeyd olunur. “Pegasus Airlines” reysləri ilə uçuşların təkcə Azərbaycan turistləri yox, həm də xarici səyahətçilər üçün maraqlı olacağı gözlənilir. Belə ki, İstanbuldan keçməklə, Londondan Qəbələyə, həftədə 3 reys var, bu reysə biletin qiyməti 145 funt sterlinqdir. Qəbələdən Londona isə biletin qiyməti daha ucuzdur - 69 funt sterlinq.

Beləliklə, “Pegasus Airlines” Qəbələ seçimini perspektivli sayır. Avropadan Qəbələyə ucuz uçuşun Qərb turistlərini Azərbaycan regionlarına cəlb edib-etməyəcəyini isə, şübhəsiz, zaman göstərəcək. Hər halda, birmənalı olaraq bunun üçün ilkin şərtlər var.

Uğur formulu

İndi də adı Azərbaycan turistlərinə az tanış olan “Pegasus Airlines” barədə. Əslinə qalsa, sarı rəngli təyyarələri və qanadlı at rəmzi ilə ən çox tanınan özəl türk aviaşirkəti dünyada geniş məlumdur. Fəaliyyətə 2005-ci ildən 5 təyyarə ilə başlayan “Pegasus Airlines” hazırda 69 yeni “Boing” və “Airbus” təyyarəsi ilə böyük aviaparka sahibdir. Onun marşrut şəbəkəsi isə Türkiyənin daxilində 33 təyinat məntəqəsi daxil olmaqla, 41 ölkədə 103 istiqaməti əhatə edir. Yalnız 2015-ci ildə aviaşirkətin uçuşlarından 22.34 milyondan çox sərnişin istifadə edib!

Bir halda ki “Pegasus Airlines” aviaşirkəti əsasən “lou-kost” seqmentində fəaliyyət göstərir, deməli, reyslərin qiyməti olduqca cəlbedicidir. Belə ki, Qəbələ-İstanbul marşrutu üzrə biletin qiyməti “Essentials” (“Baza”) başlanğıc səviyyəli paketdə (20 kiloqram baqaj və 8 kiloqram əl bağlaması haqqı daxil olmaqla) 49 avrodan başlayır. Eyni zamanda, aviaşirkətin sərnişinləri digər paketləri də seçə bilərlər. Belə ki, “Advantage” (“Sərfəli”) paketi əlavə olaraq özünə göyərtədə oturacaq yeri, uçuş zamanı qəlyanaltılar və içkilər seçimini daxil edir. Daha cəlbedici “Extra” paketi bütün bunlara əlavə olaraq, sərnişinə uçuşun tarixi və saatını pulsuz dəyişdirmək hüququ verir, onu isti yemək və 25 kiloqrama qədər baqaj daşınması ilə təmin edir. Nəhayət, bütün paketlərin alıcıları “Pegasus Plus” proqramının iştirakçıları olur, bu, onlara uçuşlar zamanı bonus xal qazanmaq imkanı verir.

Yeri gəlmişkən, təcrübə göstərir ki, yeməyi paketlə almaq onu təyyarə göyərtəsində almaqdan daha sərfəlidir, hərçənd sərnişinlərə belə bir imkan, eləcə də əlavə ödəniş müqabilində mövcud normadan artıq 30 kiloqram baqaj keçirmək imkanı verilir. Qeyd edək ki, “qarma-qarışıq” “Extra” paketi baza paketindən orta hesabla cəmi 30-40 faiz baha başa gəlir.

Üzü sərnişinlərə

“Pegasus Airlines” aviaşirkəti öz fəaliyyətində hətta kiçik detallara belə fikir verir ki, bu da “lou-kost” seqmenti oyunçusu üçün çox təəccüblü və təqdirəlayiqdir. Məsələn, şirkətin əsasən aviabiletlərin satış platforması rolunu oynayan www.flypgs.com saytı əlçatandır, yeri gəlmişkən, 10 dildə, o cümlədən türk və rus dillərindədir. Deməli, hər birimiz onlayn rejimində asanlıqla bilet seçə və ödəniş edə bilərik. Bununla da əvvəlcədən qət olunan millərə görə tələb olunan xalları qazana, nəticədə, onlardan gələcəkdə aviabiletlər almaq və ya əlavə xidmətlər üçün istifadə edə bilərik. Eyni zamanda, artıq dediyimiz kimi, “Pegasus” sərnişinlərin ehtiyaclarını ödəməsinə diqqət yetirərək, çox əlverişli və çevik qiymət siyasətindən istifadə edir.

“Pegasus Airlines” uçuşların vaxtlı-vaxtında həyata keçməsinə xüsusi əhəmiyyət verir və hətta uçuş qrafikinə dəqiq əməl etmə üzrə türk aviaşirkətləri arasında ən yaxşı göstəriciyə sahib olmağı qarşısına məqsəd qoyur. Hər halda, öz internet səhifəsində uçuşların vaxtlı-vaxtında həyata keçirilməsi barədə aylıq faizi dərc edən ilk türk aviaşirkətidir.

Nəhayət, aviaşirkət uçuşların təhlükəsizliyinə çox böyük əhəmiyyət verir. Əksər büdcə hesablı aviaşirkətlərdən fərqli olaraq, “Pegasus”un pilotlar üçün öz təlim mərkəzi və “Pegasus Technic” servis şirkəti var. Hər iki mərkəz yer və uçuş heyəti hazırlamaq üçün lisenziyaya sahibdir.

Sonda qeyd edək ki, sərnişinlərin rahatlığı üçün “Bakı Trans MMC” şirkəti - “Pegasus” və “Flydubai” aviaşirkətlərinin Azərbaycanda satış üzrə baş agenti xəttə xüsusi avtobuslar buraxıb. Həmin avtobuslar həftədə üç dəfə Bakıdan olan aviabilet sahiblərini “28 May” və “20 yanvar” metro stansiyalarından Qəbələ hava limanına çatdırır. Bu xidmətdən istifadə etmək üçün şirkətin ofisindən avtobusa bilet almaq (hər iki başa 19 manata) kifayətdir. Öz şəxsi nəqliyyat vasitəsində yola düşmək istəyənlərə isə Qəbələdəki “Qafqaz” otellərinin dayanacaqlarında pulsuz park etmə imkanı verilir.

Emil Eyyubov

məxsusi AZƏRTAC üçün