Pərvin Kərimzadə: Qarabağdakı ermənilərin gələcəyi Azərbaycana reinteqrasiyadan asılıdır
Bakı, 18 avqust, AZƏRTAC
BMT Təhlükəsizlik Şurasındakı müzakirələr bir daha Azərbaycanın dünyada nüfuzunu, Ermənistan diplomatiyasının isə tam iflasını göstərdi. Məlumdur ki, son zamanlar Ermənistan, dünyadakı erməni diasporu və lobbisi, eləcə də bütün ermənipərəst dairələr bütün imkanlarını ölkəmizə qarşı yönəltmişdilər. Məqsəd o idi ki, BMT Təhlükəsizlik Şurasında Azərbaycana qarşı sənəd qəbul olunsun. Amma bu cəhdlər nəticəsiz qaldı. Təhlükəsizlik Şurasının iclasında heç bir sənəd qəbul olunmadı. Sadəcə, çıxışlar oldu və bununla da şura işini bitmiş hesab etdi.
Bunu AZƏRTAC-a açıqlamasında YAP İdarə Heyətinin üzvü, Milli Məclisin deputatı Pərvin Kərimzadə söyləyib.
Bu iclası Ermənistan üçün növbəti fiasko hesab edən deputat deyib: “Ötən ilin dekabrında da Fransa və Ermənistan tərəfindən Laçın yolu məsələsinin BMT TŞ-də qaldırılmasına cəhd edilib. Həm o zaman, həm də indi bu cəhdlər nəticəsiz qaldı. Artıq Ermənistan və havadarları ikinci dəfə iflasa uğradılar. İclasda hamı Azərbaycanın ərazi bütövlüyünə hörmət ifadə edib və Ağdam yolunun açılmasını vacib sayıb, Azərbaycanın yerində vəziyyətə nəzarət etməsi faktını - reallıqları qəbul edib. Qırx dörd günlük Vətən müharibəsində Azərbaycan Qalib dövlət olaraq regionda yeni reallıqlar yaradıb. Hər kəs bu reallığı qəbul edib. Qalib Azərbaycan müharibədən sonra beynəlxalq münasibətlər sistemində nüfuz və gücünü əhəmiyyətli dərəcədə artırıb. Ona görə də, belə müzakirələrə ehtiyac yox idi, məsələ BMT və digər platformalarda deyil, yerində həll olunmalıdır. Çünki, ermənilər Azərbaycana qarşı beynəlxalq platformalarda hansısa əsaslı sənədlər qəbul etdirmək iqtidarında deyil. Qeyri-ciddi təşkilatların qəbul etdiyi sənədlərin hüquqi qüvvəsi yoxdur və sadəcə, reallıqdan uzaq kağız parçasıdır. Dünyanın ən böyük təşkilatı olan BMT Təhlükəsizlik Şurası isə Azərbaycana qarşı əsassız sənəd qəbul edə bilməzdi. Çünki beynəlxalq hüquq məhz bizim tərəfimizdədir”.
Ölkəmizin regionda sülhün və sabitliyin tərəfdarı olduğunu diqqətə çatdıran Pərvin Kərimzadə əlavə edib: “Ermənistanla sülh sazişi imzalamaq təşəbbüsü də ölkəmizə məxsusdur. Amma bundan sonra Ermənistan necə sülhdən danışacaq, bilinmir. Qarabağ erməniləri isə anlamalıdırlar ki, başqa yol yoxdur. Onlar Azərbaycanın şərtləri əsasında danışıqlara getməlidirlər. Qarabağ ermənilərinin gələcəyi Azərbaycana reinteqrasiyadan asılıdır. Beləliklə, BMT Təhlükəsizlik Şurasındakı müzakirələr bir daha Azərbaycanın diplomatik gücünü göstərdi. Beynəlxalq hüquq, haqq və ədalət Azərbaycanın tərəfindədir. Ən əsası Prezident İlham Əliyevin liderliyi ilə Azərbaycan ən qüdrətli dövrünü yaşayır. Güclü Azərbaycanla heç kim diktə ilə danışa bilməz”.
Bölmənin digər xəbərləri
