Politoloq: Ermənistan regionda qaranlıq qalan problemlərin həllinə bir az da kölgə salır
Bakı, 20 avqust, AZƏRTAC
Azərbaycanla sülhə yaxınlaşdıqca Ermənistan yenidən şərti sərhəddə və Qarabağ iqtisadi rayonu ərazisində Rusiya sülhməramlı qüvvələrinin müvəqqəti məsuliyyət zonasında təxribatlara əl atır, prosesi dalana dirəyir. Hazırda hərbi təxribatlarını davam etdirdiyi, əsassız iddialarla “Laçın” dövlət sərhədindən buraxılış məntəqəsi ətrafında “humanitar böhran” şousu yalanlarını tirajladığı bir zamanda Ermənistan hakimiyyətinin Qafanda yerləşən hava limanını istismara vermək istəməsi təsadüfi qərar sayıla bilməz. Bu, bölgədə sabitliyin pozulacağının anonsudur. Səsləndirdiyimiz fikirlər siyasi faktlara söykəndiyi üçün haradan qaynaqlandığını izah edə bilərik.
“Laçın” dövlət sərhədindən buraxılış məntəqəsi qurulmamışdan əvvəl ermənilər bu yoldan sui-istifadə hallarına yol verirdilər. Ermənistan dəhliz sözünü xaos və ya anarxiya ilə səhv salaraq tamam başqa niyyətlərlə məqsədli şəkildə destabilizasiya şəraiti yaratdı. Azərbaycan Laçında post qurduqdan dərhal sonra isə Ermənistan və arxasında dayanan havadarları dezinformasiyalar yaymaqla ermənilərin qanunazidd əməllərini ört-basdır etməyə cəhdlər göstərirlər. Buna Qafandakı hava limanın fəaliyyəti barədə qeyd etdiyimiz süni informasiya vakuumunun davamı kimi baxılmalıdır.
Bu sözləri AZƏRTAC-a açıqlamasında politoloq Tural Əliyev söyləyib.
Onun sözlərinə görə, Qafan Hava Limanı uçuşlara başlamamış Ermənistan tərəfindən Azərbaycana qarşı ittihamlara start verildi: “Beynəlxalq Mülki Aviasiya haqqında Konvensiyanın çətiri altında gizlənərək bir çox qanunları ayaqlar altına atan Ermənistanın Azərbaycanın hava məkanını bilərəkdən pozacağı heç kəsdə şübhə doğurmur. Dünyada sərhədə yaxın hava limanlarının mövcudluğu presedenti var, ancaq bunlar tək konvensiya ilə tənzimlənmir, dövlətlərarası, ikitərəfli razılaşmalar əsasında həll edilir. Qafan hava limanına təyyarələr eniş və uçuş edərkən avtomatik Azərbaycan hava sahəsini pozacaq, buna görə də rəsmi Bakı haqlı mövqedə dayanaraq beynəlxalq ictimaiyyəti indidən məlumatlandırır. Ermənistanın bütün sərhədyanı siyasi, hərbi addımlarının təhlili bir daha sübut edir ki, onlar əvvəlcədən hansısa planları həyata keçirmək üçün niyyətləniblər. Ermənistan daxil hansı ölkə təminat verə bilər ki, həmin hava limanı mülki don geyindirməklə hərbi məqsədlər üçün istifadə olunmayacaq? Prosesə iqtisadi cəhətdən də yanaşaq, aeroport rentabellik məqsədilə fəaliyyət göstərməyəcəksə, yuxarıda sadalanan faktların doğruluğu bir daha isbat olunur. Son dövrlər bəzi xarici ölkələrin Qafanda konsulluq açmaları, səfirlərin oraya səfərləri Ermənistanın təkbaşına qərar vermədiyi anlamına gəlir”.
Politoloq bildirib ki, Ermənistanın Zəngəzur dəhlizinin açılmasını ləngitməsi və üzərinə götürdüyü öhdəlikləri yerinə yetirməməsi səbəbindən münasibətlərin normallaşması prosesindən nəticə hasil olmur. Ermənistan Azərbaycanla yekun sülh müqaviləsini bağlamadığı üçün regionda qaranlıq qalan problemlərin həllinə bir az da kölgə salır. Ermənistan qonşu dövlətlə münasibətləri normallaşdırmaq əvəzinə tarixdə heç vaxt regiona aid olmayan ölkələrin şirin vədlərinə sadəlövhcəsinə inanmağı bir kənara qoyub, konstruktiv danışıqlara qayıtmalıdır. Eyni zamanda, avantürist Qafan Hava Limanı ideyasından vaz keçib, Azərbaycanın xəbərdarlıqlarına rasional yanaşmalıdır. Çünki indidən mümkün ola biləcək ssenariləri proqnozlaşdıra bilərik. Belə ki, zəif olduğunu anlayan Ermənistan mülki vətəndaş konsepsiyası arxasında gizlənərək Azərbaycanın hava məkanını pozub süni toqquşmalar yaratmağa cəhd edəcək.
Bu da Ermənistanın çirkin məqsədlərinə çatmaqdan ötrü beynəlxalq aləmin diqqətini absurd gündəm formalaşdırmaqla qurduğu oyunlardır. Son üç ildə Ermənistan tərəfi artıq anlamalı idi ki, Azərbaycan təhlükəsizliyinə təhdid yaradan istənilən xarici faktorları aradan qaldırmağa qadir dövlətdir. Ölkəmiz sərhəd məsələsində hava və quru fərq etməz, baş verəcək təxribatları yerindəcə zərərsizləşdirəcək. Azərbaycanın suveren sərhədlərini pozacaq hallar aşkarlanarsa, beynəlxalq qanunvericiliyə, normativlərə əsasən dərhal bütün lazımi addımlar atılacaq.
Bölmənin digər xəbərləri
