Polşa erməniləri Azərbaycan musiqisi üçün darıxmışlar
Bakı, 27 fevral (AZƏRTAC). Fevralın 26-da 25-30 nəfər erməni Sumqayıt hadisələri ilə bağlı “ictimai yığıncaq” keçirmək məqsədi ilə Ermənistan bayraqları və şüarlarla Azərbaycan Respublikasının Varşavadakı səfirliyinin qarşısına gəlmişlər.
Səfirlikdən AZƏRTAC-a bildirmişlər ki, fevralın 25-də Polşanın müvafiq qurumları tərəfindən Səfirliyə Polşa ermənilərinin yığıncaq keçirmək planları ilə bağlı məlumat verildiyindən Səfirlik tərəfindən ənənəvi olaraq ermənilərin yığıncağına qarşı önləyici tədbirlər görülmüşdü. Ermənilər səfirlik qarşısına gəldikləri zaman səfirliyi əhatə edən hasar və səfirliyin binasının ikinci mərtəbəsində yerləşən balkonların üzərində böyük hərflərlə “Xocalı”, “Xocalı qurbanlarının hüquqlarını qoruyun”, “Şaumyan terroristdir” sözləri yazılmış və Xocalı faciəsinin acı nəticələrini əks etdirən məlumat əks olunmuş çoxsaylı böyük plakatlar asılmışdı. Səfirliyi əhatə edən hasar üzərindən həmçinin iyirmiyədək Azərbaycan bayrağı, Heydər Əliyev Fondu tərəfindən göndərilmiş Xocalı soyqırımından faciəvi səhnələri əks etdirən əlliyə yaxın fotoşəkil, azyaşlı uşaqların çəkdikləri rəsmlər, səfirlik tərəfindən polyak dilində hazırlanmış 31 mart, Xocalı və 20 Yanvar faciələri ilə bağlı məlumat vərəqələri asılmışdı. Bundan əlavə ermənilərin keçirdikləri yığıncağa cavab olaraq Polşada yaşayan soydaşlarımız, Varşavada təhsil alan Azərbaycanlı tələbələr, onların polyak dostları və səfirliyin əməkdaşları əllərində Azərbaycan bayraqları tutaraq səfirliyin qarşısında dayanmışdılar.
Səfirliyə verilən məlumatda 50-80 nəfər erməninin yarım saatlıq toplaşacağı bildirilsə də, “tədbir”ə cəmi 25-30 nəfər erməni toplaşmışdı. İlk öncə Səfirlikdən aralıda yığışan ermənilər Səfirliyin hazırlıq tədbirləri və azərbaycanlıların sayca daha çox olduğunu görərək tədbirə başlamaqda tərəddüd keçirirdilər. Lakin sonda məcburiyyət qarşısında qalıb “Xocalı” sözü yazılmış plakatlar və soyqırımı aktından faciəvi səhnələri əks etdirən fotoşəkillər qarşısında dayanaraq tədbirlərinə başlamışlar. Səfirliyə daxil olan məlumatda həmçinin ermənilərin petisiyanı Azərbaycan Respublikasının səfirinə təqdim etmək istədikləri bildirilmişdi. Lakin ermənilər petisiyanı onlarla qarşı-qarşıya dayanmış səfirlik əməkdaşlarına verməyə cəsarət etməmişlər. Çünki onlar petisiyanı təqdim edəcəkləri təqdirdə, 20 adda kitab və məlumat vərəqələrindən ibarət materiallar toplusunu onlara təqdim edəcəyimizi bilirdilər. Ermənilər çarəsiz qalıb petisiyanı səfirliyin poçt qutusuna atmışlar.
Səfirliyin qarşısına toplaşan ermənilər Rəşid Behbudovun “Azərbaycan” mahnısının sədaları ilə qarşılanmış, petisiyanı Üzeyir Hacıbəylinin “Koroğlu” operasının uvertürası və “Cəngi” havasının “müşayiəti” ilə oxumağa məcbur olmuşlar. Səfirlik qarşısına toplaşmış soydaşlarımız bu zaman gur səslə “Azərbaycan”, “Qarabağ” şüarlarını səsləndirmişlər. Ermənilər kor-peşman tədbirlərini erkən (15 dəqiqədən sonra) yekunlaşdırıb Polad Bülbüloğlunun yazdığı və Müslüm Maqomayevin gur səslə ifa etdiyi “Azərbaycan” mahnısının sədaları altında yola salınmışlar. Beləcə ermənilərin Azərbaycan Səfirliyi qarşısında toplaşmaqla bağlı budəfəki üçüncü cəhdi də eyni aqibətlə başa çatmışdır.
Tədbirdən sonra səfir Həsən Həsənov soydaşlarımız və onların polyak dostları ilə görüşərək göstərdikləri dəstəyə görə təşəkkürünü bildirmişdir.
Səfirlik Xocalının günahsız qurbanlarının xatirəsini anmaq məqsədi ilə sözügedən tədbirdən iki saat sonra Varşava şəhərinin mərkəzində yerləşən Müstəqillik Muzeyinin böyük zalında daha bir ictimai tədbir keçirmişdir. Tədbirdə səfir Həsən Həsənov, Kolumbiya və Varşava universitetlərinin professoru, dünya şöhrətli tarixçi Tadeuş Şvientoxovski, Polşada fəaliyyət göstərən Azərbaycan Mədəniyyət mərkəzinin sədri Şəhla Kazımova və Varşava Universitetinin doktorantı Nataliya Konarjevska çıxış etmişlər.
Tədbir çərçivəsində həmçinin Xocalı soyqırımı ilə bağlı foto-şəkil və beynəlxalq mətbuat vasitələrinin Xocalı faciəsi ilə bağlı məlumatlarından ibarət sərgi təşkil edilmiş, müvafiq ədəbiyyat paylanmışdır.
Bölmənin digər xəbərləri
