POLŞA PREZİDENTİ LEX KAÇİNSKİNİN NİTQİ
-Çox hörmətli cənab Prezident!
Çox hörmətli xanım Əliyeva!
Mən ilk öncə, böyük məmnunluq hissi ilə bu gün Azərbaycan Respublikasının Prezidenti cənab İlham Əliyevi prezidentlik səlahiyyətinə başlayandan sonra rəsmi qonağım kimi burada qəbul etdiyimi bildirmək istəyirəm.
Düzdür, mən prezidentliyim dövründə Sizi ilk dəfədir ki, ali qonaq kimi qəbul edirəm. Lakin iftixar hissi ilə onu da qeyd etmək istəyirəm ki, son iki il ərzində biz bir-birimizlə demək olar, yeddi-səkkiz dəfə görüşmüşük. Bu, bizim münasibətlərimizin miqyasını nümayiş etdirir. Bu, eyni zamanda, ölkələrimiz arasında daha böyük yaxınlığı əks etdirir. Biz Azərbaycanı özümüzə strateji tərəfdaş kimi qəbul edirik. Biz Azərbaycanın ərazi bütövlüyünə hörmətlə yanaşırıq və ərazi bütövlüyünü dəstəkləyirik. İndi isə ikitərəfli münasibətlərimizin daha da sıxlaşdırılması üçün əlimizdən gələni edirik.
Məncə, heç kim deyə bilməz ki, son iki il ərzində bizim başladığımız hər hansı bir iş uğursuz olub. İlk öncə, bizim Bakıda ikitərəfli, daha sonra isə GUAM ilə Polşa arasında görüşlərimiz olub. Bildiyimiz kimi, Azərbaycan GUAM təşkilatında çox önəmli rol oynayır. Eyni zamanda, mənim Krakovda və Vilnüsdə GUAM təşkilatının iclaslarında çıxışlarım və görüşlərim olmuşdur. Bütün bunlar ikitərəfli münasibətlərin ümumi vəziyyətinə əlavə təkan verir. Eyni zamanda, çoxtərəfli münasibətləri də inkişaf etdirir.
Mən bunu bir daha aydın şəkildə bəyan etmək istəyirəm ki, bu gün Polşa Azərbaycanla ikitərəfli münasibətlərin inkişafı sahəsində daha fəal olmaq istəyir və həmçinin Azərbaycanla dostluq əlaqələrini inkişaf etdirən ölkələrlə də öz əlaqələrini genişləndirmək fikrindədir. Təbii ki, burada Gürcüstan və Ukraynanın əsas rolları nəzərdə tutulur.
Biz enerji sahəsində ümumi işlərin, ümumiyyətlə, işbirliyinin qurulmasını arzulayırıq. Eyni zamanda, öz siyasi münasibətlərimizi də möhkəmləndirmək fikrindəyik. Bu, Azərbaycanın Avratlantik məkana inteqrasiya olunmaq arzusu baxımından çox vacibdir. Bu münasibətlər və maraq sırf enerji məsələsi ilə bağlı deyil. Bu, eyni zamanda, uzun əsrlər boyu bizim ölkələrimizi və xalqlarımızı bir-birinə bağlayan zəngin adət-ənənələrdən irəli gəlir.
Cənab Prezident, əminəm ki, Sizin və birinci xanımın Polşa Respublikasına rəsmi səfəri həmin əlaqələrin daha da dərinləşməsinə təkan verəcəkdir. Biz bütün maneələri aradan qaldırmaqda kifayət dərəcədə güclü olmalıyıq. Bu elə maneələrdir ki, biz onların hamısından yaxşı xəbərdarıq. Bunlar bizim qarşımızda böyük maneə kimi dura bilməz, regionumuzun təhlükəsizliyi və sabitliyi yolunda bizə maneə ola bilməz. Bu, elə bir region olmalıdır ki, burada dövlətlərin sabitliyi təmin edilsin.
Nitqimi yekunlaşdıraraq onu xatırlatmaq istəyirəm ki, iki dövlət arasında olan münasibətlər sırf siyasətçilər tərəfindən inkişaf etdirilmir. Cənab Prezident, bilmirəm, Siz mənim fikrimlə razılaşarsınız ya yox, lakin bu baxımdan son vaxtlar mənim adi insanlarla keçirdiyim görüşlər ona dəlalət edir ki, bu münasibətlər xalqlar, adi insanlar səviyyəsində də genişlənir.
Mən məhz bu sözlərlə öz badəmi, cənab Prezident, Sizin, birinci xanımın və Azərbaycan xalqının şərəfinə qaldırmaq istəyirəm.
######
Bölmənin digər xəbərləri
