Polşa XİN Ukraynaya qoşun göndərməyəcəklərini bəyan edib
Bakı, 14 may, AZƏRTAC
Qərb ölkələri öz qoşunlarını Ukraynada yerləşdirmək üçün əməliyyata başlasa belə, Polşa hərbçilərini bu ölkəyə göndərməyəcək.
AZƏRTAC xəbər verir ki, Polşanın xarici işlər naziri Radoslav Sikorski bunu “Onet.pl” internet portalına müsahibəsində deyib.
“Polşa əməliyyatın bir hissəsi olsa belə, Ukraynaya hərbçi göndərməyəcək”, - deyə nazir ABŞ Prezidenti Donald Trampın Ukrayna üzrə xüsusi nümayəndəsi Keyt Kelloqun dörd Avropa ölkəsindən Ukraynaya hərbi kontingent göndərmək planları barədə bəyanatını şərh edərkən bildirib.
Eyni zamanda, Polşanın müdafiə naziri Vladislav Kosinyak-Kamış Keyt Kelloqun bəyanatından sonra ölkəsinin Ukraynaya hərbi kontingent göndərməyi planlaşdırmadığını deyib. Bundan öncə Polşa rəhbərliyinin digər nümayəndələri də eyni mövqeni dəfələrlə ifadə ediblər.
Bölmənin digər xəbərləri
