Premyer Liqa: "Qarabağ" "Sumqayıt"a darmadağınla qalib gəlib
Bakı, 8 dekabr, AZƏRTAC
Futbol üzrə Azərbaycan Premyer Liqasında bu gün XVI tura start verilib.
AZƏRTAC xəbər verir ki, ilk oyun günü “Sumqayıt” son çempion “Qarabağ”ı qəbul edib.
“Kapital Bank Arena”da keçirilən qarşılaşma Ağdam təmsilçisinin 6:1 hesablı qələbəsi ilə başa çatıb. Qonaq komandanın ilk qolunu 21-ci dəqiqədə Leondro Andrade vurub. 29-cu dəqiqədə Juninyo adını tabloya yazdırıb. Abdullah Zubir 33-cü, Yassin Benzia isə 53-cü dəqiqədə aktivinə xal yazdırıb. L.Andrade 73-cü dəqiqədə dubl edərək komandasının 5-ci qolunun müəllifi olub. Hamidu Keyta isə 86-cı dəqiqədə rəqibin qapısına yol taparaq matça nöqtəni qoyub. Meydan sahiblərində isə yeganə qola 43-cü dəqiqədə Erik Sorqa imza atıb.
Bu nəticədən sonra "köhlən atlar" 35 xalla liderliyini möhkəmlədib. "Gənclik şəhəri" təmsilçisi isə 23 xalla üçüncü sırada qalıb.
Qeyd edək ki, XVI turun “Qəbələ” - “Kəpəz”, “Zirə” - “Araz-Naxçıvan” oyunları dekabrın 9-da, “Sabah” - “Səbail”, “Neftçi” - “Turan Tovuz” qarşılaşmaları isə dekabrın 10-da oynanılacaq.
Bölmənin digər xəbərləri
