Prezident İlham Əliyev budəfəki Münxen Konfransında da konstruktiv mövqe nümayiş etdirdi
Bakı, 21 fevral, AZƏRTAC
Beynəlxalq təhlükəsizlik məsələlərinin müzakirə olunduğu Münxen Təhlükəsizlik Konfransı mühüm platformalardan biridir. Bu konfransda qlobal səviyyədə ən vacib və aktual problemlər üzrə diplomatik təşəbbüslər irəli sürülür.
Tarixə nəzər salsaq, 2020-ci ildə Münxen Təhlükəsizlik Konfransında Prezident İlham Əliyevin Ermənistanın baş naziri Nikol Paşinyanla debatı ona görə yadda qaldı ki, dövlətimizin başçısının hadisələrə yanaşması konstruktiv idi. Prezident İlham Əliyev auditoriyaya tarix dərsi keçdi. Anlatdı ki, taleyüklü məsələlərdə obyektiv mövqe tutmaq lazımdır.
Problemin kökünə nəzər salan dövlətimizin başçısı opponentinə və dünyaya izah etdi ki, Azərbaycanla Ermənistan arasındakı məsələ nə dinlərarası mübarizədir, nə də ədavətdir. Bu, ermənilərin ərazi iddiaları ilə əlaqədar qarşıdurmadır. Təbii ki, hər hansı problemi kökündən həll etmək üçün mücərrədlik olmamalıdır. Azərbaycan Prezidenti tarixi faktlara əsaslanan arqumentləri ilə Ermənistan rəhbərini susdurdu və bununla da konfiqurasiya yaratdı.
Prezident İlham Əliyev budəfəki Münxen Təhlükəsizlik Konfransında da konstruktiv mövqe nümayiş etdirdi. Qeyd etdi ki, bölgədə bizim öz müharibəmiz var və regionda sabitliyin bərpası üçün sülh sazişi təklif edirik. Dövlətimizin başçısı mesaj verdi ki, taleyüklü məsələlərin həllində magistral yoldan çıxmaq olmaz. Bu yol sülh və sabitlik yoludur.
Bunu AZƏRTAC-a açıqlamasında politoloq Tofiq Abbasov söyləyib.
Politoloqun sözlərinə görə, konfrans çərçivəsində keçirilən Cənubi Qafqaz ölkələri liderlərinin görüşünə qədər Azərbaycan mətbuatına müsahibə verən Prezident İlham Əliyev üçtərəfli formatda xeyli faydalı işlər görməyin mümkün olduğunu diqqətə çatdırdı. “Hamı Cənubi Qafqazın üç ölkə rəhbərinin birgə toplantısından konstruktiv nəticə gözləyirdi. Amma panelin hər iki moderatorunun qeyri-peşəkarlığı, savadsızlığı gözləntiləri doğrultmadı. Onlar bilərəkdən söhbəti başqa istiqamətə yönəltdilər. Niyyətləri də o idi ki, Azərbaycan, Gürcüstan və Ermənistanı anti-Rusiya blokuna daxil etsinlər. Amma bütün panel iştirakçıları, moderatorlar da gördü ki, onların qarşısında Azərbaycan Prezidenti İlham Əliyev kimi mahir diplomat və siyasətçi var. Həmişə olduğu kimi reallığa söykənən faktlarla danışan dövlətimizin başçının mövqeyi tam aydın idi.
Paşinyan isə yenə cəfəng fikirlər səsləndirməklə özünü rüsvay etdi. Guya Laçın yolunda blokada var, avtobusda uşaqlar ağlayırdı və sair. Ermənistan baş nazirinin arqumentləri çox cılız idi. Paşinyan Azərbaycan Prezidentinin yanında uğursuz şagird kimi görünürdü”, - deyə T.Abbasov bildirib.
Builki Münxen Təhlükəsizlik Konfransında gərginliyin yaşanmasından da danışan politoloq qeyd edib ki, burada söhbət yalnız Fransa Prezidenti Makrondan getmir. Konfransda iştirak edən fövqəltəbii dövlətlərin rəhbərləri mövcud risklərin, təhlükəli çağırışların qarşısını almaq üçün optimal variantlar təklif etməli idilər. Mövcud problemlərin həlli üçün təhlükəsizlik qüvvələri, beyin mərkəzlərinin rəhbərləri çıxış yollarını təklif etməlidirlər. Yəni əvvəlcə gərginlik yaradan səbəblərdən danışılmalıdır. Aydınlaşdırmaq lazımdır ki, onlar siyasətlərini nəyin üzərində qururlar və istəkləri nədən ibarətdir?
“Dünya ölkələrinin üzləşdiyi problemlər insan orqanizmindəki xəstəlikləri xatırladır. Əgər ürəkdə aritmiya varsa, onu yaradan səbəblərdən başlamaq lazımdır və təbii ki, hər şeyi adı ilə çağırmaq lazım gəlir. Bir sözlə, problemlərin səbəbləri müəyyən edilməlidir ki, onunla mübarizə aparmaq mümkün olsun. Budəfəki Münxen Konfransında biz gördük ki, tədbiri təşkil edənlər, böyük siyasətçilər, ekspertlər, yəni əsas fikir daşıyıcıları bir qayda olaraq, proseslərə Rusiya-Ukrayna müharibəsinin prizmasından baxırlar. İnanıram ki, Azərbaycanın siyasi mövqeyi sonda qalib gələcək, regionda sülh və sabitlik bərpa olunacaq”, - deyə Tofiq Abbasov fikirlərini ifadə edib.
Bölmənin digər xəbərləri
