Prezidentimizin uzaqgörən siyasəti nəticəsində Azərbaycan xalqı dünyada əzmkar, qürurlu xalq kimi tanındı
Bakı, 9 noyabr, AZƏRTAC
Müzəffər Ali Baş Komandan, Prezident İlham Əliyev dövlətimizin başçısı seçildiyi ilk vaxtlardan müqəddəs amal uğrunda - işğal altında qalan torpaqlarımızı azad etmək üçün yorulmadan, usanmadan çalışdı. Prezidentimizin gərgin əməyi və uzaqgörən siyasəti nəticəsində Azərbaycanın ərazi bütövlüyü təmin edildi, xalqımız dünyada əzmkar, qürurlu xalq kimi tanındı.
AZƏRTAC xəbər verir ki, bunu Milli Məclisin deputatı, Bakı Dövlət Universitetinin kafedra müdiri, professor Kamilə Əliyeva deyib.
Deputat vurğulayıb ki, Vətən müharibəsində qazandığımız Qələbəmizi şərtləndirən amillərdən biri də Prezident İlham Əliyevin Azərbaycanı iqtisadi cəhətdən güclü bir dövlətə çevirməsi oldu. Məhz bu dayanıqlı iqtisadiyyat nəticəsində Azərbaycan Ordusu dünyanın ən güclü orduları sırasında yer aldı. Dövlət büdcəsindən ordumuza kifayət qədər vəsait ayrıldı. Azərbaycan Silahlı Qüvvələri dünyanın ən müasir silahları ilə təchiz edildi. Azərbaycan münaqişə dövründə nüfuzlu beynəlxalq təşkilatlarla əməkdaşlıq etdi və münaqişənin həlli üçün hüquqi baza yaratdı. BMT-nin Baş Assambleyası, Qoşulmama Hərəkatı, Avropa Şurası, Avropa Parlamenti, İslam Əməkdaşlıq Təşkilatı və bir sıra beynəlxalq təşkilatlarda qətnamələr qəbul edildi. Görülən bütün işlər Azərbaycanı qalibiyyətə - Zəfər Gününə aparırdı.
O qeyd edib ki, ölkə tarixində 2020-ci ildə qazandığımız böyük Zəfər kimi möhtəşəm hadisə yaşamamışdıq: “Azərbaycan dövlətinin və xalqının qazandığı bu hərbi və siyasi Qələbə dünyada öz unikallığı ilə tarixə yazılmış oldu. Dünya tarixində belə bir hadisə olmamışdır ki, bir dövlət 30 il işğalda olan torpaqlarını 44 gün ərzində hərbi və siyasi yolla azad etsin. Xalqımız bunu bacardı. Azərbaycan xalqı öz Liderinin, Müzəffər Ali Baş Komandan, Prezident İlham Əliyevin rəhbərliyi altında sıx birləşərək bütün dünyaya öz gücünü, mübarizliyini nümayiş etdirdi. 44 gün ərzində Azərbaycan Ordusunun əsgər və zabitləri böyük şücaət və qəhrəmanlıq göstərdi, döyüşlər zamanı bir addım belə geri çəkilmədi. Əsgərlərimiz torpaqlarımız və dövlətimiz naminə öz canlarını, qanlarını əsirgəmədilər. Azərbaycan xalqı həmişə olduğu kimi, müharibə zamanı da öz Prezidentinin ətrafında sıx birləşdi, öz ordusunun arxasında dayandı. Bu vəhdət dəmir yumruğa çevrildi. Elə bir yumruğa çevrildi ki, bu yumruğu açmağa heç kimin nə gücü, nə də qüdrəti çatmaz”.
Deputat bildirib ki, Prezident İlham Əliyevin hərb meydanında müzəffər sərkərdə olması ilə yanaşı, diplomatik cəbhədə də böyük diplomat və güclü siyasətçi olması öz təsdiqini tapdı. Dövlətimizin başçısı 44 gün ərzində informasiya sahəsində Azərbaycan xalqının haqq səsi oldu, cəsarətlə, qətiyyətlə bütün xarici təzyiqlərə sinə gəldi və mübarizlik rəmzinə çevrildi. İlham Əliyev Prezident seçildiyi ilk vaxtdan bir gün də olsun, Qarabağla bağlı xalqımızın ruh düşkünlüyünə qapılmasına yol vermədi. Xalqımız da hər zaman Vətən həsrətini, Vətən sevgisini ürəyində yaşatdı. Hər zaman Vətəni, dövləti sevməyi və qorumağı hər şeydən üstün tutan gənclərimiz də bu ruhda tərbiyə olundu. Müharibəni də məhz bu ruhda yetişən gənclərimizin qəhrəmanlığı nəticəsində qalib xalq kimi qazandıq", - deyə K.Əliyeva vurğulayıb.
Azərbaycanımızın Qarabağa, Şərqi Zəngəzura qovuşduğunu bildirən deputat qeyd edib ki, Azərbaycan Ordusu Xocalı qurbanlarının, müharibədə günahsız qətlə yetirilmiş mülki əhalimizin, şəhidlərimizin qisasını döyüş meydanında aldı. Biz bütün dünyaya göstərdik ki, bir qarış torpağımızı da işğalda saxlamayacağıq.
K.Əliyeva deyib ki, böyük Zəfərdən sonra artıq Böyük Qayıdış proseslərinə start verilib. Müzəffər Ali Baş Komandan İlham Əliyev böyük dövlət xadimi, dünya azərbaycanlılarının lideri kimi indi işğaldan azad edilmiş torpaqlara qayıdış prosesinə rəhbərlik edir. Bu missiyada da bütün Azərbaycan xalqı İlham Əliyevin ətrafında mütəşəkkil birləşib.
Bölmənin digər xəbərləri
