Prezidentin forumda toxunduğu hər bir məsələ aktualdır və geniş tədqiqat mövzusudur – deputat
Bakı, 11 aprel, AZƏRTAC
ADA Universitetində Prezident İlham Əliyevin iştirakı ilə keçirilmiş “Yeni dünya nizamına doğru” mövzusundakı beynəlxalq forum dünyanın siyasi və iqtisadi gündəmində olan mühüm məsələlərə peşəkar yanaşmaların öyrənilməsi baxımından böyük əhəmiyyət kəsb edir. Xüsusilə Prezident İlham Əliyevin çıxışı və ünvanlanan müxtəlif səpkili suallara verdiyi məzmunlu cavablar, regionda və dünyada baş verən siyasi-iqtisadi proseslərə aydın mövqe sərgiləməsi, Azərbaycan-Ermənistan arasındakı sülh prosesinə yanaşması xüsusi maraqla qarşılanıb.
Bu fikirləri AZƏRTAC-a müsahibəsində Milli Məclisin deputatı Mehriban Vəliyeva deyib.
Deputat beynəlxalq məsələlərin müzakirəsinə həsr olunmuş bu forumun artıq yeddinci dəfə keçirilməsi və iştirakçı sayında davamlı artımın onun beynəlxalq əhəmiyyətini bir daha sübut etdiyini vurğulayıb: “Ötən illərdə ümumilikdə 60 ölkədən 200-dən artıq ekspert və alim bu tədbirlərdə – Bakı və azad edilmiş Qarabağın dörd şəhərində – iştirak edərək sonradan regional və qlobal mövzularda elmi məqalələrlə çıxış ediblər. Bu, ölkəmizlə bağlı həqiqətlərin və Azərbaycanın uğurlu siyasətinin beynəlxalq miqyasda tanıdılmasına mühüm töhfə verir. Builki konfransa rekord sayda – 80 əcnəbi iştirakçı qatılıb. Onların 50 faizindən çoxu ilk dəfədir ki, bu forumda iştirak edir. Konfransın mövzusu olduqca aktualdır. Bu gün dünyanın aparıcı beyin mərkəzləri və siyasi institutları formalaşmaqda olan yeni dünya düzənini və onun ətrafında baş verən prosesləri diqqətlə tədqiq edir. Azərbaycan da Prezident İlham Əliyevin rəhbərliyi ilə bu proseslərin fəal iştirakçısına çevrilib. Bakı nəinki regionda, həm də qlobal miqyasda mühüm təşəbbüslərin və çağırışların müəllifidir.
Azərbaycanın mövqeyi isə kifayət qədər aydındır – suverenliyin toxunulmazlığı, daxili işlərə müdaxilənin yolverilməzliyi, siyasi-iqtisadi münasibətlərdə müstəqillik və təzyiqə qarşı prinsipial mövqe ölkəmiz üçün qırmızı xətdir. Bu prinsiplər təkcə Azərbaycan üçün deyil, hazırda təhdid altında olan bir çox ölkə üçün də keçərlidir”.
Mehriban Vəliyeva bildirib ki, İkinci Dünya müharibəsindən sonra formalaşmış siyasi düzən bu gün yeni reallıqlara cavab vermir, dəyişən şərtlər fonunda öz aktuallığını itirir: “Dünyadakı mövcud münaqişələr, müharibələr, Qərbdə yaşanan siyasi və mənəvi böhranlar yeni siyasi baxışın zəruriliyini diktə edir. Neoimperializm siyasəti dövlətlərin müstəqilliyini ciddi təhdid altına alır. Qərb ölkələri öz sistem və baxışlarını digər ölkələrə zorla tətbiq etməyə çalışırlar. Bu zaman ədalət, qanunun aliliyi, beynəlxalq hüquq prinsipləri arxa plana keçir. Onlar hətta öz maraqlarına uyğun olan, cinayətkar və işğalçı rejimləri belə müdafiə edirlər. Bunu Ermənistan nümunəsində aydın görmək olar. Otuz ilə yaxın Azərbaycan torpaqlarını işğal altında saxlayan, etnik təmizləmə və vandalizm törədən Ermənistan bu gün beynəlxalq aləmdə “əzilən”, “sülh tərəfdarı” kimi təqdim olunur.
Eyni zamanda, Avropa İttifaqı, ABŞ və bəzi beynəlxalq təşkilatlar Qərb-Mərkəzi Asiya əlaqələrinin inkişafında maraqlıdır, lakin bəzən bu əlaqələri Azərbaycanın iştirakı olmadan qurmağa çalışırlar. Prezidentin də qeyd etdiyi kimi, Azərbaycanın nəzərə alınmamasının mümkünsüzlüyünü başa düşmək üçün sadəcə xəritəyə baxmaq kifayətdir. Avropada bəzi dairələr isə Cənubi Qafqazda ayrıcı xətlər yaratmaq niyyətindədir. Lakin Azərbaycan qarşıdurmanın deyil, əməkdaşlığın, dialoqun və sağlam rəqabətin tərəfdarıdır”.
Deputat əlavə edib ki, COP29 kimi qlobal əhəmiyyətli tədbirlərə uğurla ev sahibliyi edən Azərbaycan dünyaya bu mövqeyini nümayiş etdirib: “Ətraf mühitin qorunması, iqlim və ərzaq təhlükəsizliyi kimi çağırışların müzakirə olunduğu belə beynəlxalq tədbirlərdə Prezident İlham Əliyevin səsləndirdiyi mesajlar və çağırışlar həm regional, həm də qlobal səviyyədə mühüm əhəmiyyət daşıyır”.
M.Vəliyeva qeyd edib ki, dövlətimizin başçısı forum çərçivəsində müxtəlif beyin mərkəzlərinin nümayəndələrinin suallarını əhatəli şəkildə cavablandıraraq, Cənubi Qafqazdakı vəziyyət və Azərbaycan-Ermənistan münasibətlərinin normallaşması ilə bağlı məsələlərə aydınlıq gətirib: “Sülh sazişinə nail olunması üçün Azərbaycanın prinsipial mövqeyi bir daha bəyan edilib. Tarixi ədalət və beynəlxalq hüquq artıq bərpa olunub, indi isə regionda qalıcı sülhün təmin olunması əsas hədəfdir. Azərbaycan hər zaman olduğu kimi, sülh mövqeyinə sadiqdir.
İsrail-Türkiyə münasibətlərində Azərbaycanın rolu, Əfqanıstan və İraqda NATO üzvü olmayan ilk ölkə olaraq iştirakımız, ABŞ-da Demokratlar və Respublikaçılar dövründə Bakı-Vaşinqton münasibətlərindəki fərqlər, eləcə də ABŞ-Avropa münasibətləri ilə bağlı Prezidentin fikirləri geniş təhlil və tədqiqat tələb edir. Xüsusilə də Rusiya-Ukrayna müharibəsinin davam etdiyi bir vaxtda və Rusiya ilə müttəfiqlik münasibətlərimiz mövcud olduğu halda, Prezident İlham Əliyevin Rusiya tərəfindən Ukraynanın ərazilərinin işğal edildiyini açıq şəkildə bildirməsi olduqca cəsarətli mövqedir”.
Sonda deputat vurğulayıb ki, dünyanın gərginlik yaşadığı bir zamanda Azərbaycanın sabitlik adasına çevrilməsi dövlətimizin başçısının həyata keçirdiyi uzaqgörən və düzgün siyasətin nəticəsidir: “Bu gün Azərbaycan beynəlxalq arenada təşəbbüskar bir ölkə kimi çıxış edir. Bakı, Xankəndi, Şuşa kimi şəhərlərimiz beynəlxalq konfranslara ev sahibliyi edir, qlobal problemlərin müzakirə olunduğu mərkəzə çevrilir. Bütün bunlar Azərbaycanın düzgün və qətiyyətli yolda olduğunu göstərir”.
Bölmənin digər xəbərləri
