Qala Dövlət Tarix-Etnoqrafiya Qoruğuna infotur təşkil edilmişdir
Bakı, 24 sentyabr (AZƏRTAC). Azərbaycanda 2011-ci ilin “Turizm ili” elan olunması ilə bağlı bu sahənin müxtəlif növlərini inkişaf etdirmək, daxili turizm bazarının fəallığını artırmaq məqsədilə regionlara infoturlar təşkil edilir.
AZƏRTAC xəbər verir ki, bu tədbirlərin davamı olaraq sentyabrın 24-də Mədəniyyət və Turizm Nazirliyinin təşkilatçılığı ilə Qala Dövlət Tarix-Etnoqrafiya Qoruğuna infotur təşkil edilmişdir.
“Azərbaycanda yeni turizm marşrutları kəşf edək” devizi altında keçirilən infoturun məqsədi Abşeronun ən qədim yaşayış məskənlərindən olan Qala qəsəbəsindəki Dövlət Tarix-Etnoqrafiya Qoruğunun turizm potensialı ilə daha yaxından tanışlıq olmuşdur. İnfoturda 30-dək turizm şirkətinin nümayəndələri və jurnalistlərdən ibarət 50 nəfərlik heyət iştirak etmişdir.
Turizm şirkətləri və KİV-lərin nümayəndələri əvvəlcə qoruqdakı informasiya mərkəzində olmuşlar. Burada onlara Bakı şəhərindən 25 kilometr şimal-şərqdə yerləşən və Abşeronun ən hündür nöqtəsi olan Qala qəsəbəsinin tarixi, əhalisinin həyat tərzi və məşğuliyyəti barədə məlumat verilmişdir.
Bildirilmişdir ki, 5 min əvvəl burada yaşayış olmuşdur. Bakının digər yaşayış məskənləri kimi, Qala kəndi də yadelli işğalçıların hücumlarının dəf olunmasında mühüm rol oynamışdır. Ta qədimdən kənd sakinləri dulusçuluq, heyvandarlıq, əkinçilik, dəmirçiliklə məşğul olmuşlar. Ötən əsrin 30-cu illərindən başlayaraq kəndin ərazisində ilk neft quyuları qazılmışdır. Əkin sahələri neft mədənlərinin altında qaldığından qalalılar kənddən köçməyə başlamışlar. Kəndin evləri sökülmüş, tarixi abidələri dağıdılmışdı. Lakin 1988-ci ildə Qalanın tarixi hissəsində Azərbaycan hökumətinin qərarı ilə Dövlət Tarix-Etnoqrafiya Qoruğunun yaradılması bu kəndin itməkdə olan etnoqrafiyasını özünə qaytarmışdı. Qoruq Azərbaycanın tarixi, mədəniyyəti və adət-ənənələrinin gələcək nəslə ötürülməsində mühüm rol oynayır.
Heydər Əliyev Fondunun dəstəyi və təşəbbüsü ilə 2008-ci ildə qoruğun ərazisində Qala Arxeoloji-Etnoqrafik Muzey Kompleksi yaradılmışdır. Muzey kompleksində Abşeron yarımadasında tapılmış eramızdan əvvəl III və II minilliklərə aid kurqanlar, qayaüstü rəsmlər, məişət və bəzək əşyaları, silah və sikkələr toplanmış, yaşayış və digər memarlıq abidələri ilk görünüşündə olduğu kimi qurulmuşdur. Muzeyin ərazisi 1,2 hektardır.
Qeyd olunmuşdur ki, yerli və xarıcı turistlər qoruq ərazisində onların ixtiyarına verilmiş velosipedlər və veloavtomobillər vasitəsilə 3 marşurt üzrə hərəkət edəcəklər. Onlar böyük tarixi olan bir kəndın bu günə gəlib çatan həyat tərzi və memarlıq abidələri ilə tanışlıqdan olduqca razı qalacaqlar.
Sonra XII əsr abidəsi olan Qum hamamına, bərpa olunmuş həyətlərə, Etno-Ekoloji Mərkəzə, Qala qəsrinə gəzinti təşkil olunmuşdur. Ekskursiya iştirakçılarına bu memarlıq abidələri haqqında məlumat verilmişdir. Qala Arxeoloji-Etnoqrafik Muzey Kompleksi və Əntiq Əşyalar Muzeyinin eksponatları iştirakçıların marağına səbəb olmuşdur.
Tədbirdə Prezident İlham Əliyevin müvafiq Sərəncamı ilə 2011-ci ilin ölkəmizdə “Turizm ili” elan edilməsinin Azərbaycanda bu sektorun inkişafı baxımından əhəmiyyətli addım olduğu bildirilmişdir. Abşeronun turizm imkanlarının öyrənilməsində və təbliğində, turizm şirkətləri ilə əməkdaşlıq şəraitində işgüzar mühitin yaradılmasında, yerli və xarici turistlərin cəlb edilməsində belə infoturların əhəmiyyəti yüksək qiymətləndirilmişdir.
Bölmənin digər xəbərləri
