Qanunsuz ov edənlər 52 600 manat cərimə ödəmişlər
Bakı, 30 mart (AZƏRTAC). Ekologiya və Təbii Sərvətlər Nazirliyi (ETSN) qanunsuz ov hallarının qarşısını almaq məqsədi ilə yanvarın 1-dən martın 27-dək keçirdiyi reydlərin nəticələrini açıqlamışdır.
ETSN-dən AZƏRTAC-a verilən məlumata görə, nazirliyin aidiyyəti qurumlarının əməkdaşları Altıağac, Ağgöl, Hirkan, Şirvan, Şahdağ Milli Parklarının ərazisində, Qızılağac, Zaqatala, İlisu Dövlət Təbiət Qoruqlarında və Samux, Qırmızıkənd, Zəvvar, Sarısu, Mahmudçala, Ağzıbir, Uludüz Ovçuluq Təsərrüfatlarında qanunsuz ovla məşğul olan şəxsləri saxlamış və onlara inzibati qaydada cərimə tətbiq edilmişdir.
Aparılan araşdırmalar zamanı “Ovçuluq haqqında” Azərbaycan Respublikası Qanununun tələblərinə əməl etməyən 61 nəfər saxlanılmış, onlardan 61 ov silahı və 229 patron götürülmüşdür. Ümumilikdə qanunu pozanlar 52 600 manat cərimə olunmuşlar.
Bölmənin digər xəbərləri
