Qanunsuz ov edənlər cərimələnmişlər
Bakı, 8 mart (AZƏRTAC). Fevralın 28-dən martın 2-dək Ekologiya və Təbii Sərvətlər Nazirliyinin (ETSN) əlaqədar qurumlarının əməkdaşları ölkə ərazisində “Ovçuluq haqqında” Qanunun tələblərinə əməl olunmasını araşdırmaq məqsədilə növbəti reydlər keçirmişlər.
Nazirliyin mətbuat xıdmətindən AZƏRTAC-a bildirmişlər ki, Zaqatala Dövlət Təbiət Qoruğunun Katex sahəsinin 1 saylı dolayının ərazisində qanunsuz ovla məşğul olan Balakən rayonunun Tülü kənd sakinləri Yaşar Padarov, Ramiz Akkubayev, İsrafil Hekəlovdan və Talalar kənd sakini Loğman İbrahimovdan 4 ov tüfəngi və patronlar götürülmüşdür. Onların hər biri 1000 manat məbləğində cərimə olunmuşdur.
Balakən rayonunun Qazma kəndi yaxınlığındakı “Tuğay çölü” adlanan sahədə qanuna məhəl qoymayan Qurban Surxayov, Məhəmməd Əliyev, Sahib Məmmədov və Fərman Nəbiyevdən götürülən 4 ov tüfəngi, 14 ədəd patron aktlaşdırılmış və bu şəxslərin hər biri 1000 manat məbləğində cərimə edilmişdir.
Xaçmaz rayonunun Nərəcan kəndi ərazisində aparılan araşdırma zamanı isə çöl quşlarının kütləvi ovlanması məqsədilə quraşdırılmış süni qurğular dağıdılaraq məhv edilmiş, 2 tor götürülüb aktlaşdırılmışdır.
Samux Dövlət Ovçuluq Təsərrüfatında qanunu pozan Şəmkir şəhər sakini Vaqif Məmmədov saxlanılmış, onda 1 ov tüfəngi və ovlanmış kəklik aşkar edildiyi üçün 1000 manat cərimə ödəmişdir.
Bölmənin digər xəbərləri
