Qarabağ işğal dövründə dünyanın ən çox hərbiləşmiş zonalarından birinə çevrilib - AÇIQLAMA
Bakı, 26 sentyabr, AZƏRTAC
Qarabağdakı qeyri-qanunu erməni silahlılarının tərk-silah prosesi davam edir. Əldə olunan silah-sursata baxdıqda otuz il ərzində erməni separatçılarının Azərbaycan ərazilərinin hərbi silahlarla çirkləndirməsinin şahidi oluruq. Həmin ərazilər dünyanın ən çox hərbiləşdirilən zonalarından birinə çevrilib. Dövlət qurumlarımız lokal antiterror tədbirinin nəticəsində nəzarətə götürülən silah-sursatın bir hissəsini xarici səfirliklərin ölkəmizdəki attaşelərinə nümayiş etdirib.
Bunu AZƏRTAC-a açıqlamasında hərbi ekspert, polkovnik-leytenant Elxan Şıxəliyev deyib. O qeyd edib ki, antiterror tədbirləri çərçivəsində ələ keçirilən silah-sursat separatçıların silahlarının bir hissəsidir.
“Azərbaycanın nəzarətinə keçən ərazilərin böyük hissəsinə erməni separatçıları tərəfindən artilleriya, zirehli texnika və minalar yerləşdirilib. Dünyada həmin ərazi qədər silahlarla çirkləndirilən ikinci bölgə yoxdur. Ordumuzun nəzarətinə keçən bölgələrin silah və minalardan təmizlənməsi uzun müddət vaxt apara bilər. Separatçıların əlində qalan əsas silahlar hərbi hissələrin qərargahlarında və anbarlarındadır. Qərargahlar isə əsasən, şəhər mərkəzlərində yerləşir. Zirehli texnika, tank, piyada döyüş maşınları, artilleriya, reaktiv atəş və radioelektron maneə sistemləri kimi silahlar hələ də separatçıların əlindədir. Ordumuz həmin qərargahlara çatdıqda texnikalar müəyyən mərhələlərlə Azərbaycana təslim ediləcək”, - deyə hərbi ekspert vurğulayıb.
E.Şıxəliyev prosesin mərhələlərlə davam etməsinin əsas səbəbini də açıqlayıb: “Ermənilər ərazilərə saysız-hesabsız minalar yerləşdiriblər. Bu isə Azərbaycan Ordusunun şəxsi həyəti üçün ciddi təhlükə yaradır. Piyada əleyhinə minalar Laçın dəhlizinin Azərbaycan nəzarətində olmadığı dövrdə Ermənistan vasitəsilə Xankəndinə daşınıb. Düşmən minaları meşələrə, dağlara, hətta cığırlara belə basdırıblar. Antiterror əməliyyatının fəal fazası dayansa da, passiv fazası hələ də davam edir. Odur ki, minaların vurduğu zərəri hesablasaq ona uyğun cəmiyyətimiz səbirli olmalıdır”.
Hərbi ekspertin sözlərinə görə, silah tacirləri dünyadakı münaqişələr vasitəsilə böyük pullar qazanırlar. Azərbaycanın Qarabağda həyata keçirdiyi tərk-silah prosesi zamanı separatçıları dəstəkləyən qüvvələrin çox böyük vəsaitlər xərclədiyi silahları açıq şəkildə görülür. Bunu Vətən savaşında əldə edilən qənimətlərlə də sübut etmək olar. Fransa, Hindistan kimi silah ticarəti ilə məşğul olan dövlətlər proses zamanı xüsusilə fəallıq göstərirdilər. “Boz zona” şəffaflaşdıqca, həmin silahlar Azərbaycan Ordusunun nəzarətinə keçdikcə tacirlik edən ölkələr ciddi narahatlıq hissi keçirdir. Dövlətimiz 44 günlük müharibədən sonra Silahlı Qüvvələrimizə ayrılan maliyyə vəsaitinin həcmini artırdı. Xüsusilə, orduya ayrılan maliyyə vəsaiti ötən illərə nisbətən qat-qat çoxdur. Bunun əsas səbəbi Qarabağdakı separatçıların müharibədən sonra bölgədən çıxmaq əvəzinə, daha da möhkəmlənmək cəhdləri idi. Bütün bunlar göstərir ki, bir sutkalıq antiterror əməliyyatının uğurla yekunlaşması Ali Baş Komandan İlham Əliyevin uzaqgörən siyasətinin nəticəsidir.
Bölmənin digər xəbərləri
