“Qarabağda Harvardı necə quraq?” mövzusunda müzakirələr davam edir
Bakı, 7 dekabr, AZƏRTAC
“T-NETWORK” təhsil işçilərinin təcrübə və kommunikasiya platformasının Təhsil İdarəçiləri Assosiasiyası ilə birlikdə təşkil etdiyi "Qarabağda Harvardı necə quraq?" başlıqlı silsilə müzakirələr davam edir.
“T-NETWORK”dan AZƏRTAC-a bildirilib ki, məqsəd ölkəmizdə dünya səviyyəli ali təhsil müəssisəsi qurmağın yollarını mütəxəssislərlə müzakirə etmək, yol xəritəsi təqdim etməkdir. "Qarabağda Harvardı necə quraq?" müzakirələrin növbəti qonağı Bakı Dövlət Universitetinin müəllimi, BP şirkətinin Azərbaycan, Gürcüstan, Türkiyə regionunda xarici əlaqələr və strategiya üzrə vitse-prezidenti Bəxtiyar Aslanbəylidir.
Bu gün saat 21.00-da keçiriləcək müzakirə Təhsil İdarəçiləri Assosiasiyasının (TİA) həmtəsisçisi və “T-NETWORK” platformasının inkişaf və tədqiqat üzrə baş mütəxəssisi Qoşqar Məhərrəmovun təqdimatında TİA-nın “Facebook” səhifəsindən canlı yayımlanacaq.
Xatırladaq ki, bu günə qədər müzakirələrdə Amerikada doktorantura təhsili almış, hazırda fəaliyyətinə ADA Universitetində müəllim və Dağlıq Qarabağın Azərbaycanlı İcması İctimai Birliyində İdarə Heyətinin sədr müavini olaraq davam edən Gülməmməd Məmmədov və Amerikanın Northeastern Universitetində kibertəhlükəsizlik üzrə doktorantura təhsili alan və tədqiqat asistenti olaraq çalışan Bəhruz Cəbiyev iştirak ediblər.
Bölmənin digər xəbərləri
