Qaxda 13 min hektar sahədə payızlıq dənli bitkilərin səpini proqnozlaşdırılır
Qax, 29 sentyabr, Mustafa Dadaşov, AZƏRTAC
Qax rayonunun təsərrüfatlarında gələn ilin məhsulu üçün 13 min hektar sahədə payızlıq dənli bitkilərin səpini proqnozlaşdırılır. Əkin sahələrinin 9,5 min hektarına buğda, 3,5 min hektarına isə arpa səpilməsi nəzərdə tutulur. Payızlıq dənlilərin səpini üçün bu günədək təsərrüfatlarda 8,5 min hektaradək sahədə şum qaldırılıb və hazırda bu iş davam etdirilir.
Bu barədə AZƏRTAC-ın bölgə müxbirinə Qax Dövlət Aqrar İnkişaf Mərkəzinin bitkiçilik sektorunun baş məsləhətçisi Ülvi Əzimov məlumat verib.
Bildirilib ki, səpin üçün 2,6 min ton toxum tələb olunur. Ayrılan toxum hazırda laboratoriya müayinəsindən keçirilərək təmizlənir və dərmanlanır. Səpində iştirak edəcək traktor və toxumsəpən aqreqatlar təmir olunaraq saz vəziyyətə gətirilir. Payızlıq dənlilərin səpininə oktyabrın ortalarında başlamaq nəzərdə tutulur.
Qeyd edək ki, builki mövsümdə rayonda 12 min 412 hektar sahənin məhsulu biçilib, 37 min 177,4 ton taxıl istehsal olunub. Hər hektardan orta məhsuldarlıq 29,9 sentner təşkil edib.
Bölmənin digər xəbərləri
