REGİONLAR
Qaxın seçki məntəqələrində yüksək seçici fəallığı qeydə alınır - REPORTAJ
Qax, 7 fevral, Mustafa Dadaşov, AZƏRTAC
113 saylı Qax-Şəki seçki dairəsinin seçki məntəqələrində növbədənkənar Azərbaycan Respublikası Prezidenti seçkiləri seçicilərin fəallığı şəraitində davam edir. Səsvermə hüququ olan vətəndaşlar səhər saatlarından etbarən seçki məntəqələrinə gəlir, müstəqil Azərbaycanın daha da inkişaf etməsi, qüdrətlənməsi naminə öz vətəndaşlıq borclarını yerinə yetirməyə tələsirlər.
AZƏRTAC-ın bölgə müxbiri xəbər verir ki, seçki dairəsinin digər məntəqələrində olduğu kimi, 4 saylı seçki məntəqəsində də səhər saatlarından yüksək seçici fəallığı müşahidə olunur. Qax rayon Mədəniyyət Mərkəzində yerləşən seçki məntəqəsində səsvermənin gedişini veb-kamera vasitəsilə izləmək də mümkündür. Eyni zamanda, səsvermə prosesini müxtəlif siyasi partiyaları və ictimai birlikləri təmsil edən 9 nəfər yerli müşahidəçi izləyir.
Səsvermənin azad, demokratik və şəffaf keçirilməsi üçün məntəqədə lazımi şərait yaradılıb. Seçici şəxsiyyətini təsdiqləyən müvafiq sənədi təqdim etdikdən sonra ultrabənövşəyi lampa vasitəsilə onun sol əlinin baş barmağının gözə görünməyən mürəkkəblə işarələnib-işarələnmədiyi yoxlanılır. Sonra seçicinin barmağı gözə görünməyən mürəkkəblə işarələnir və ona bülleten verilir.
Məntəqə seçki komissiyasının sədri Dilşad Mustafayevanın məlumatına görə, məntəqə üzrə 1007 seçici qeydə alınıb. Onlardan 9 nəfərinin yaşı 80-dən yuxarıdır. İlk olaraq məntəqə üzrə ən yaşlı seçici, 1930-cu il təvəllüdlü Davudova Firuzə Nəbi qızı seçki bülletenini götürüb, seçimini edərək seçki qutusuna atıb. Seçkidə iştirak etməkdən qürur hissi keçirdiyini vurğulayan Firuzə nənə ürək sözlərini AZƏRTAC-la bölüşüb: “Əvvəlki seçkilərdə olduğu kimi, bu seçkiyə də böyük həvəslə gəldim. Seçki məntəqəsində məni çox yaxşı qarşıladılar, təlimatlandırdılar. Seçki bülletenində olan namizədlərin adlarını diqqətlə oxudum. Ən layiqli namizədə, ölkəmin inkişafını təmin edə biləcək insana səs verdim”.
Seçicilərə yaxınlaşıb, onların səsvermənin gedişi ilə bağlı fikirlərini öyrənirik. Təhsil işçisi Kifayət Fərhadova deyib: “İndiyədək bir çox seçkilərdə iştirak etmişəm. Budəfəki seçkilər isə digərlərindən fərqlənir. Bu seçki Zəfər seçkisidir. Qəhrəman Ordumuz 44 günlük Vətən müharibəsində doğma Qarabağımızı düşmən işğalından azad edib, ərazi bütövlüyümüz bərpa olunub. Uzun illər arzulayırdıq ki, torpaqlarımız geri alınsın, məcburi köçkünlərimiz evlərinə qayıtsın, Qarabağımızda da seçkilər keçirilsin. Arzularımız artıq reallaşıb. İndi Azərbaycan bütövləşib. Prezident seçkiləri ölkəmizin bütün ərazisini əhatə edir. Bu gün hamımızın bir arzusu var: Azərbaycan daha da inkişaf etsin, qüdrətlənsin. Ona görə də mən bu gün böyük həvəslə səs vermək üçün məntəqəyə gəldim, arzuladığım namizədə, sabitliyə, əmin-amanlığa, Azərbaycanın xoşbəxt gələcəyinə səs verdim”.
Həmin məntəqədə səs verən rayon ağsaqqalı Mais Şabanov da səsverməyə böyük ruh yüksəkliyi ilə gəldiyini bildirib: “Açığını deyim ki, budəfəki seçkilərdə yaradılan şərait əvvəlkilərdən də yüksəkdir. Səsvermə gözlədiyimizdən də yaxşı səviyyədə keçir, seçici fəallığı çox yüksəkdir. Hamı sərbəst şəkildə öz seçimini edir, istədiyi namizədə səs verir. Komissiya üzvləri seçiciləri çox mehriban qarşılayırlar. Mən də öz seçimimi etdim, Azərbaycanı yüksək zirvələrə apara biləcək ən layiqli namizədə səs verdim”.
Dairənin 2 nömrəli məktəb-liseyin binasında yerləşən 2 saylı seçki məntəqəsində də prezident seçkiləri seçicilərin yüksək fəallığı şəraitində keçir.
Qeyd edək ki, 113 saylı Qax-Şəki seçki dairəsinin tərkibinə daxil olan 72 seçki məntəqəsinin 59-u Qaxda, 13-ü isə Şəki rayonunda yerləşir. Dəqiqləşdirilmiş son seçici siyahılarına görə, dairə üzrə 54 min 330 seçici qeydə alınıb. Onlardan 2732 nəfəri bu seçkilərdə ilk dəfə səs verir. Seçicilərin 937 nəfəri 80-100 yaş arasındadır. Bütün seçki məntəqələri lazımi avadanlıqla, rabitə və digər texniki vasitələrlə təmin edilib. Səsvermənin gedişini izləmək üçün 10 seçki məntəqəsində veb-kamera quraşdırılıb. Dairə üzrə 960 yerli müşahidəçi qeydiyyatdan keçib, 620 seçiciyə qeydiyyatdançıxma vəsiqəsi verilib.