SİYASƏT
Qazaxıstan Azərbaycanlıları Assosiasiyasının birinci qurultayı öz işinə başlamışdır
Bakı, 29 oktyabr (AZƏRTAC). Oktyabrın 29-da Almatı şəhərində Qazaxıstan Azərbaycanlıları Assosiasiyasının (QAA) birinci qurultayı öz işinə başlamışdır.
Azərbaycan Respublikasının Diasporla İş üzrə Dövlət Komitəsindən AZƏRTAC-a bildirmişlər ki, qurultaya Qazaxıstanın dövlət, hökumət rəsmiləri, deputatlar, ziyalılar, incəsənət xadimləri, o cümlədən Türkiyə, Rusiya, Qırğızıstan, Almaniya, Özbəkistan və digər xalqların Qazaxıstandakı mədəniyyət mərkəzlərinin rəhbərləri dəvət olunmuşlar.
Tədbirdə Diasporla İş üzrə Dövlət Komitəsinin şöbə müdiri Füzuli Nəcəfov da iştirak edir.
Qurultayda Assosiasiyaya üzv olan vilayət, şəhər, rayon təşkilatları sədrlərinin və təftiş komissiyası rəhbərlərinin hesabatları dinləniləcək, quruma yeni sədr seçiləcəkdir.
Qazaxıstan Azərbaycanlıları Assosiasiyası Prezident Nursultan Nazarbayevin sədrlik etdiyi Qazaxıstan Xalqları Assambleyasının üzvüdür.