Qazaxıstan ilə İran arasında nəqliyyat-logistika sahəsində əməkdaşlıq müzakirə edilib
Astana, 25 sentyabr, AZƏRTAC
Qazaxıstan nəqliyyat nazirinin müavini Talqat Lastayev və İran İslam Respublikasının səfiri Əli Əkbər Cövkar arasında keçirilən görüşdə iki ölkə arasında nəqliyyat-logistika sahəsində əməkdaşlığın cari məsələləri müzakirə olunub.
AZƏRTAC Qazaxıstan Nəqliyyat Nazirliyinə istinadla xəbər verir ki, İran tərəfi Qazaxıstanda yol layihələrində iştirak etməkdə maraqlı olduğunu bildirib.
Avtomobil nəqliyyatı ilə bağlı ikitərəfli saziş layihəsinə xüsusi diqqət yetirilib. Tərəflər sənədin bütün aspektlərini yekunlaşdırmaq və sonra onu imzalamaq üçün əlavə danışıqlar aparmağa razılaşıb.
Trans-Xəzər Beynəlxalq Nəqliyyat Marşrutu (TITR) çərçivəsində əməkdaşlığın dərinləşdirilməsi perspektivləri də müzakirə edilib.
Görüşdə Astara və Aktau limanları arasında əməkdaşlığın genişləndirilməsi ətrafında fikir mübadiləsi aparılıb. Tərəflər ticarət dövriyyəsinin və dəniz daşımalarının həcminin artmasına töhfə verə biləcək bu sahədə əhəmiyyətli əməkdaşlıq potensialını qeyd ediblər.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
