Qazaxıstanda inflyasiya son 14 ilin maksimumuna çatıb
Bakı, 12 dekabr, AZƏRTAC
Noyabr ayında Qazaxıstanda inflyasiya illik ifadədə 19,6 faiz artaraq tarixi maksimuma çatıb.
AZƏRTAC Qazaxıstan mediasına istinadla xəbər verir ki, bunu Prezident Kasım-Jomart Tokayev hökumətin geniş iclasında çıxış edərkən deyib.
“Bu ilin 11 ayı ərzində iqtisadi artım 4,6 faizdən 2,7 faizə qədər yavaşıyıb. Son 14 ildə inflyasiya tarixi maksimuma çataraq 19,6 faiz təşkil edib. Bu vəziyyət əhalinin həyat səviyyəsinə və gəlirlərinə mənfi təsir göstərib”, - deyə Kasım-Jomart Tokayev bildirib.
Baş nazir Əlixan Smailov isə öz növbəsində vurğulayıb ki, inflyasiyaya geosiyasi gərginlik, dünyada qiymət artımı, logistik əlaqələrin pozulması və bəzi malların ixracına müvəqqəti məhdudiyyətlərin tətbiqi səbəb olub. Onun sözlərinə görə, hazırda hökumət inflyasiyanı nəzarətdə saxlanılmaq və azaltmaq istiqamətində kompleks tədbirlər görür.
Bölmənin digər xəbərləri
