Qəbələdə meşələrin yanğından qorunması və yeni ağacların əkilməsi üçün tədbirlər görülür
Qəbələ, 15 avqust (AZƏRTAC). Qəbələ rayonunda meşələrin mühafizə olunması və bərpası diqqət mərkəzində saxlanılır.
AZƏRTAC xəbər verir ki, rayonda meşələrin qanunsuz qırılmasının qarşısının alınması və yanğından mühafizəsi üçün tədbirlər görülür. Yay mövsümündə istirahət etmək üçün Qəbələnin dağlıq ərazilərinə, meşələrlə əhatə olunmuş mənzərəli yerlərinə, göl, şəlalə və çay kənarlarına üz tutan çoxsaylı turistlərə yanğın təhlükəsizliyi qaydaları ilə bağlı tövsiyələr verilir, müxtəlif yerlərə məlumat xarakterli əyani vasitələr qoyulur. Meşə fonduna yaxın ərazilərdə yaşayan vətəndaşlarla, bələdiyyə üzvləri ilə tez-tez görüşlər keçirilir, yanğından qorunma qaydaları barədə söhbətlər aparılır. Məhz belə maarifləndirmə tədbirlərinin nəticəsidir ki, bu il rayonun meşələrində yanğın hadisəsi qeydə alınmamışdır.
Rayonda meşə fondunun qorunması ilə yanaşı, yeni meşəliklərin salınmasının da qayğısına qalınır. Cari ildə rayon meşələrin mühafizəsi və bərpası müəssisəsinin 8 hektara yaxın tinglik təsərrüfatında 949 min ting yetişdirilmiş, iki hektar sahədə yeni tinglik salınmışdır. Bu ilin yaz aylarında Bum, Vəndam, Yenikənd və Zarağan meşəbəyliklərinin ərazilərindəki dövlət meşə fondunun torpaqlarında plana uyğun olaraq, 32 hektar sahədə mədəni meşə salınmışdır. Əkin zamanı qoz, şabalıd, akasiya, vələs, göyrüş, ağcaqayın, palıd, fıstıq və digər qiymətli ağac növlərinə üstünlük verilmişdir. Cari ilin payız-qış aylarında isə daha 40 hektar ərazidə yeni meşəliyin salınması nəzərdə tutulur.
Bölmənin digər xəbərləri
