Qəbələdə yaşı 800-1000 il olan şabalıd ağacları təbiət abidəsi kimi qorunur
Qəbələ, 6 aprel (AZƏRTAC). Qəbələ rayonunda xüsusi mühafizə olunan şabalıd ağacları nadir təbiət abidəsi kimi qorunur.
Rayon meşələrin mühafizəsi və bərpası müəssisəsindən AZƏRTAC-a bildirmişlər ki, Qəbələdə şabalıd ağaclarının qorunması üçün ardıcıl tədbirlər görülür. Cari ilin birinci rübündə rayonda dövlət meşə fondunun ərazisində 5 hektar sahədə keyfiyyətli və iri meyvəsi olan “Xandıx” şabalıdının 5500 ədəd tingi əkilmişdir.
Dağətəyi kəndlərdə şabalıd əhalinin əsas gəlir mənbəyi hesab edilir və həyətyanı sahələrdə, pay torpaqlarında bu ağacların əkini geniş vüsət almışdır. Meşələrdə və həyətyanı sahələrdə yaşı 500-800 il, hündürlüyü 30-35 metr olan iri gövdəli qiymətli şabalıd ağacları ciddi mühafizə olunur. Həmzəli kəndində yaşı 800-1000 il, diametri 2-2,5 metr olan 10-a yaxın nadir şabalıd ağacı isə təbiət abidəsi kimi Ekologiya və Təbii Sərvətlər Nazirliyinin siyahısına daxil edilmişdir.
Hazırda rayonda 347 hektar sahədə şabalıd bağları mövcuddur. Ötən il bağbanlar 462 ton şabalıd yığmışlar.
Bölmənin digər xəbərləri
