Qədim İçərişəhərlə tanışlıq Vyetnamın nümayəndə heyətində böyük təəssürat oyadıb
AZƏRTAC xəbər verir ki, əvvəlcə Qız qalası abidəsinin qeyri-adi memarlıq xüsusiyyətləri barədə qonaqlara məlumat verilib.
Qeyd edilib ki, eramızdan əvvəl VII-VI əsrlərdə ucaldılmış bu qala XII əsrdə bərpa olunub. Hündürlüyü 28 metr, diametri 16-16,5 metr olan silindrik formalı bu tarixi abidə əsas qaladan və cənub tərəfdən ona bitişik dayaq tikilidən ibarətdir. Hazırda Qız qalasında muzey konservasiyası işləri aparılır.
Sıratağlı dini-memarlıq kompleksinin ərazisindəki ekspozisiya ilə tanışlıq qonaqlarda böyük maraq doğurub.
Vyetnam nümayəndə heyətinin üzvləri elektromobildə ərazini gəzərkən onlara UNESCO tərəfindən Dünya İrs Siyahısına daxil edilmiş “İçərişəhər” Dövlət Tarix-Memarlıq Qoruğu, burada aparılan təmir-bərpa işləri barədə ətraflı məlumat verilib. Qeyd edilib ki, İçərişəhər ərazisində dövlət tərəfindən mühafizə olunan müxtəlif əsrlərə aid nadir tarixi-memarlıq abidələri vardır.
Qonaqlar Şərqin arxitektura şedevrlərindən biri olan dünya əhəmiyyətli “Şirvanşahlar Sarayı Kompleksi” tarixi-memarlıq abidəsi ilə də tanış olublar. Bildirilib ki, XV əsrin əvvəlində tikilmiş bu tarixi abidə İçərişəhərin ən yüksək nöqtəsində yerləşir və Xəzər dənizi tərəfdən, həmçinin şəhərin ətrafındakı yüksəkliklərdən çox aydın görünür.
Azərbaycan paytaxtının qədim abidəsi ilə tanışlıqdan xatirə olaraq Le Honq Anha hədiyyə təqdim olunub.
Bölmənin digər xəbərləri
