Qərbi Azərbaycandan olan həndbol hakimi: İnanıram ki, tezliklə yurd həsrətinə son qoyulacaq
Bakı, 6 fevral, AZƏRTAC
“İnanıram ki, yurd həsrətinə tezliklə son qoyulacaq, əzəli və əbədi torpaqlarımıza qovuşacağıq”.
Bu sözləri AZƏRTAC-a açıqlamasında Azərbaycanın həndbol üzrə beynəlxalq dərəcəli hakimi Ələkbər Ağakişiyev deyib.
Qərbi Zəngəzurun Qafan şəhərinin Şabadin kəndindən olan 54 yaşlı referi yaşadıqları ərazidə ermənilərin azərbaycanlılara qarşı kobud rəftarından, insanlığa sığmayan vəhşiliklərindən bəhs edib: “Ermənilər 1918-ci ildə kəndimizə basqın etmiş, uşaq, qadın, yaşlı demədən amansızcasına qətlə yetirmişdilər. Babam və əmilərimlə bu barədə söhbətlərimiz heç vaxt yadımdan çıxmaz. Bu soyqırımı zamanı bizim yaxın qohumlarımız öz dədə-baba torpaqlarından didərgin düşdü, bəziləri isə həlak oldu”.
O, münaqişənin sovet hakimiyyəti qurulduqdan sonra bir qədər səngidiyini söyləyib: “Amma ermənilər həmişə azərbaycanlıları sıxışdırıb, heç vaxt yüksək vəzifələrdə işləməyə qoymayıblar. Şabadin dağlar və meşəliklərlə əhatə olunmuş füsunkar bir kənd idi. Mənim uşaqlığım burada keçıb. Əmim və dayılarımın sözlərinə görə, 1986-1988-ci illərdə ermənilər kənd camaatına təzyiqlər etməyə başladılar. 1988-ci ilin noyabr və dekabr aylarında qonşu kənddə yaşayan ermənilər Şabadin camaatına təzyiq göstərərək kəndən köçmələrini tələb edib, onları ölümlə hədələyiblər. Həmin kənddə yaşayan bibim, dayılarım və əmilərim gecə ilə ailə üzvlərini götürüb Qubadlıya köçüb, bir müddət sonra isə Bakı, Sumqayıt və digər bölgələrdə məskunlaşıblar. Yaşlı insanların əksəriyyəti 1-2 il ərzində Vətən həsrətindən dünyalarını dəyişdilər. Dayım və bibim oğlu isə Birinci Qarabağ müharibəsində şəhid oldular”.
Ə.Ağakişiyev bütün Qərbi azərbaycanlıların bir gün doğma el-obalarına qayıdacaqlarına inandığını bildirib: “Şükürlər olsun ki, İkinci Qarabağ müharibəsində Ali Baş Komandan İlham Əliyevin rəhbərliyi altında Ordumuz erməni faşizmini məhv etdi və torpaqlarımız azad olundu. Əminəm ki, biz də bu sevinci yaşayacaq, öz dədə-baba yurdumuza qayıdacağıq”.
Bölmənin digər xəbərləri
