QEYRİ-HÖKUMƏT TƏŞKİLATLARININ DÖVLƏT QURUMLARI İLƏ ƏMƏKDAŞLIĞINI ƏNƏNƏYƏ ÇEVİRMƏLİ
QHT Milli Forumunun sədri Azay Quliyev bildirmişdir ki, bu tədbir qeyri-hökumət təşkilatlarının icra orqanları, Milli Məclis, dövlət aparatı ilə əməkdaşlığının ənənəvi hal almasına doğru atılmış addımdır. Seminar-müşavirəyə sədrlik edən BMM-nin direktoru Cəfər Cəfərovun fikrincə, QHT-nin dövlət qurumları ilə normal tərəfdaşlıq münasibətlərinin yaradılması yalnız cəmiyyətin xeyrinə olardı.
Əmək hüquqlarının müdafiəsi liqasının sədri Sahib Məmmədovun sözlərinə görə, hazırda dövlət orqanları ilə QHT arasında anlaşma meylləri müşahidə olunur. Milli Məclisin sosial siyasət daimi komissiyasının sədri Hadi Rəcəbli vurğuladı ki, son illər QHT ölkədə faydalı iş aparır, onun sıralarında təcrübəli idarəetmə kadrları yetişir, lakin qeydiyyata alınmış 1600 QHT-dən çox azı fəaliyyət göstərir. Bu, QHT-nin qanunları bilməyən, danışıqlar aparmağı, mətbuatla, müxtəlif qurumlarla münasibətlər qurmağı bacarmayan bir çox nümayəndələrinin səriştəsizliyinin nəticəsidir. Deputat ölkə daxilində üçüncü sektorun fəaliyyəti üçün donorlar axtarışının, QHT-nin sosial vergiləri məcburi qaydada ödəməsinin zəruriliyini vurğulayaraq, bir sıra tövsiyələr verdi, üçüncü sektor nümayəndələrinin maraqlı ideyalarının dəstəklənəcəyini bildirdi.
Milli ekoloji proqnozlaşdırma mərkəzinin prezidenti, “Qeyri-hökumət sektorunun problemləri və inkişaf perspektivləri” QHT Forumu layihəsinin monitorinq qrupunun rəhbəri Telman Zeynalov Prezident fərmanlarının gerçəkləşdirilməsində dövlət qurumları ilə yanaşı, QHT nümayəndələrinin də geniş iştirakı ideyasını irəli sürərək dedi ki, dövlət qurumları bu fərmanların yerinə yetirilməsində ictimaiyyətə arxalanmalı, ölkə rəhbərliyinin nəzərdə tutduğu planların gerçəkləşdirilməsi ilə bağlı məqsədyönlü fəaliyyətdə onların iştirakını əlaqələndirməlidir. Bu, QHT ilə dövlət orqanları arasında səmimi işgüzar münasibətlərin nizama salınması üçün ən yaxşı vasitə olardı.
