Bakı, 27 sentyabr, AZƏRTAC

Sentyabr ayının 27-də saat 9:00-dan başlayaraq 24 saat ərzində Qırğızıstanın paytaxtı Bişkek şəhərində müxtəlif ünvanlarında yerləşən, “A MEDİA” şirkətinə məxsus 22 elektron lövhədə 6 dəqiqədən bir və hər dəfə on saniyə görünməklə üçrəngli bayrağımızın fonunda rus dilində “Qarabağ Azərbaycandır!” və “Qəhrəmanlarımızı qürurla anırıq!” şüarları nümayiş etdirilib.

Azərbaycanın Qırğızıstandakı səfirliyindən AZƏRTAC-a bildirilib ki, daha öncə səfirlik tərəfindən 27 sentyabr – Anım Günü ilə bağlı geniş press-reliz hazırlanaraq Qırğızıstanın Xarici İşlər Nazirliyinə, ölkədə akkreditasiya edilmiş səfirliklər və beynəlxalq təşkilatların nümayəndəliklərinə, həmçinin mətbuata göndərilib, səfirliyin binası önündə Ermənistanın terrorunu əks etdirən xüsusi guşə yaradılıb.

Səfirlikdən onu da bildiriblər ki, səfirlik binasının önündə keçirilən anım mərasimində Bişkek şəhərinin sakinləri, ölkənin ictimai-siyasi xadimləri, Qırğızıstanda fəaliyyət göstərən universitetlərin müəllim-professor heyəti, Azərbaycan diasporunun nümayəndələri və jurnalistlər mülki əhaliyə qarşı xain hücumun nəticələrini əks etdirən guşənin önünə gül-çiçək dəstələri qoyub, Vətən uğrunda canından keçmiş Azərbaycan şəhidlərinə ehtiramlarını ifadə ediblər.

Daha sonra aksiya iştirakçıları erməni terrorunun qurbanı olan günahsız insanların xatirəsini bir dəqiqəlik sükutla yad edərək onların ruhlarına dualar oxuyublar.

Azərbaycanın və Qırğızıstanın Dövlət Bayraqlarının dalğalandığı aksiyada “Anım Günü – Milli qürur günü!”, “Şəhidlər ölməz!”, “Şəhidləri ehtiramla anırıq!”, “Vətən var olsun!”, “Sağ ol, Azərbaycan əsgəri!” və digər oxşar şüarlar səsləndirilib.

Qırğız Respublikasının Gimnastika Federasiyasının prezidenti Əsəd Əsədov giriş sözü ilə çıxış edib, Azərbaycan torpaqlarının erməni barbarlarından azad olunması uğrunda baş vermiş Vətən müharibəsinin ildönümünün qeyd edilməsi tədbirində iştirakına görə hər kəsə dərin təşəkkürünü bildirib. Federasiya prezidenti qeyd edib ki, 44 gün davam edən, qalibiyyətlə başa çatan hərbi əməliyyatlar nəticəsində şanlı Azərbaycan Ordusu mənfur düşməni darmadağın etməklə uzun illər işğal altında qalan torpaqlarımızı azad edərək Müzəffər Ali Baş Komandanın rəhbərliyi ilə şanlı Silahlı Qüvvələrimiz bütün dünyaya öz qüdrətini və gücünü göstərib.

Qırğız-Türk Manas Universitetinin İqtisadiyyat və İdarəetmə Fakültəsinin Beynəlxalq əlaqələr bölümünün dosenti Mehmet Emin Erendor, Qırğızıstan-Azərbaycan dostluq cəmiyyətinin sədri Akif Alaferdov, “Mərkəzi Asiyada Azərbaycanlıların birliyi” İctimai Birliyinin prezidenti Xansıvar Baxşəliyev, Pervomaysk kənd orta məktəbin rus dili və ədəbiyyat müəllimi Alla Qurbanova və digərləri çıxış edərək Müzəffər Ali Baş Komandan cənab İlham Əliyevin qətiyyətli rəhbərliyi ilə torpaqlarımızın işğaldan azad olunması uğrunda Vətən müharibəsində şəhid olanlara Allahdan rəhmət, qazilərimizə şəfa diləyib, belə qəhrəman övladlar yetişdirdikləri üçün onların ailələrinə minnətdarlıqlarını ifadə edərək qazanılmış Zəfərdə misilsiz rolu olan şəhidlərin heç vaxt unudulmayacağını bildiriblər.

Sonda çıxış edən səfir Hidayət Orucov Vətən müharibəsi, Ermənistan-Azərbaycan Dağlıq Qarabağ münaqişənin tarixi, Ermənistan işğalının ağır nəticələri, bu nəticələrin regionun sabitliyi və inkişafına təsiri, uzun illər ATƏT-in Minsk qrupu çərçivəsində aparılan nəticəsiz danışıqlar barədə məlumat verib. Səfir diqqətə çatdırıb ki, Prezident İlham Əliyev bütün yüksək beynəlxalq təşkilatların kürsülərindən Azərbaycanın münaqişəni hərbi yolla da həll etməyə qadir olduğunu dəfələrlə bəyan edərək danışıqlar və sülh yolunu münaqişənin həlli üçün prioritet istiqamət olaraq seçib və uzun müddət Azərbaycan dövlətinin bu istiqamətdə iradəsini ortaya qoyub. Buna baxmayaraq, işğalçı ölkə tərəfindən hansısa cavab addımı atılmayıb. Hidayət Orucov buna görə də Ermənistanın məsuliyyət daşıdığını bildirib, hətta döyüşlərin getdiyi müddətdə Prezident İlham Əliyevin telemüraciətlərində Azərbaycan tərəfinin istənilən vaxt hərbi əməliyyatları dayandırmağa hazır olduğunu dəfələrlə bəyan etdiyini xatırladıb, bunun üçün Ermənistan işğal etdiyi ərazilərdən çıxacağı ilə bağlı qrafiki elan etməli idi və bildiyimiz kimi, bu, baş vermədi.

Səfir çıxışında vurğulayıb ki, Azərbaycan beynəlxalq ictimaiyyətdə müharibə üçün legitim hüquq qazanıb və bütün beynəlxalq konvensiyaların tələblərinə uyğun olaraq yalnız Ermənistan ordusu ilə müharibə aparılıb. Daha sonra Hidayət Orucov 2021-ci il aprelin 9-da Qırğız Respublikasının Prezidenti Sadır Japarov tərəfindən qəbul olunarkən Prezident İlham Əliyevi və bütün Azərbaycan xalqını Vətən müharibəsində qazanılan möhtəşəm Qələbə və dədə-baba torpaqlarımızın işğaldan azad olunması münasibətilə təbrik etdiyini diqqətə çatdırıb. Çıxışda qırğız xalqının dəstəyinin hər məqamda hiss olunduğu qeyd edilərək, ölkənin tanınmış ictimai-siyasi xadimlərinin, görkəmli ziyalılarının, yaradıcılıq təşkilatlarının, digər şəxslərinin və qurumlarının Prezidentimizə müharibə zamanı çoxsaylı dəstək məktubları göndərdikləri, daha sonra Qələbə münasibətilə təbrik etdikləri xatırladılıb.

Aksiyadan sonra səfir Hidayət Orucov tədbirdə iştirak edən təşkilatların ağsaqqallarını səfirliyə dəvət edərək onlarla söhbət edib.