Qlobal neft təklifi tələbi üstələməyə davam edəcək
Bakı, 14 yanvar, AZƏRTAC
Qlobal neft təklifindəki artım tələbatdakı artımı üstələməyə davam edəcək, bu da neft qiymətlərinə təsirsiz ötüşməyəcək.
AZƏRTAC xəbər verir ki, bu barədə ABŞ-ın Enerji İnformasiya Administrasiyasının (EIA) yaydığı məlumatda deyilir.
Bildirilir ki, xam neft istehsalında güclü artım, eləcə də tankerlərdə və üzən anbarlarda saxlanılan neft həcmlərinin artması Rusiya və Venesueladan qaynaqlanan geosiyasi risklərin ixracata potensial təsirini kölgədə qoyub. Bu tendensiya ötən ilin ikinci yarısında qlobal neft ehtiyatlarının sürətli artmasına səbəb olub və anbarlara yığımın 2026-cı və 2027-ci illərdə də davam edəcəyi gözlənilir. Çinin strateji neft ehtiyatlarını davamlı artırması isə qiymətlər üçün sabitləşdirici amil kimi ön plana çıxır. Keçən il qlobal ehtiyat artımlarının əhəmiyyətli bir hissəsi Çinin strateji ehtiyatlarına yönəldilib, bu da tələbə bənzər bir təsir yaradıb və kəskin qiymət enişlərini məhdudlaşdırıb. Çinin cari ildə ehtiyat artımını gündəlik 1 milyon bareldən bir qədər aşağı səviyyədə saxlaması və 2027-ci ildə bu tempi yavaşlatması gözlənilir.
EIA-ya görə, bu il OPEC+ qrupunun neft istehsalının cari hədəflərdən təxminən 900 min barel aşağıda olacağı proqnozlaşdırılır. Qrup ilin birinci rübündə hasilatı sabit saxlamaq qərarını təsdiqləsə də, yüksək ehtiyat yığımı gözləntisi səbəbindən 2027-ci ildə də istehsal artımı gözlənilmir.
Qeyd olunur ki, Venesuela perspektivdə ən əhəmiyyətli qeyri-müəyyənlik mənbələrindən biri olaraq qalır. Neft ixracına dair sanksiyalar və tanker müdaxilələri səbəbindən ölkənin neft ixracının gündəlik təxminən 600 min barel azaldığı və buna uyğun olaraq da istehsalın dayandırıldığı təxmin edilir. Sanksiyaların mümkün yumşaldılması və ya ABŞ siyasətində dəyişiklik təklifin bolluğu olan bazarda neft qiymətlərinə aşağı istiqamətli təzyiqi artıracağı nəzərdə tutulur.
Bölmənin digər xəbərləri
