Qoşulmama Hərəkatı Gənclər Təşkilatı və NAYORA arasında görüş olub
Bakı, 21 iyul, AZƏRTAC
Qoşulmama Hərəkatı Gənclər Təşkilatının (QHGT) mənzil-qərargahında QHGT və təşkilatın Azərbaycan üzrə Milli Bölməsi olan Azərbaycan Respublikası Gənclər Təşkilatları Milli Şurası (NAYORA) arasında görüş baş tutub.
AZƏRTAC xəbər verir ki, görüş zamanı ARGTMŞ-nin İdarə Heyətinin üzvləri mənzil qərargahı və qərargah daxilində təsis olunan QH gənclərinin tədqiqat mərkəzinin şəraiti ilə tanış olublar. Mərkəz QH gənclərinin üzləşdiyi problemləri araşdırmaq və həll yollarını tapmaq üçün təhlillər aparmaq məqsədilə yaradılıb.
Görüş ARGTMŞ-nin sədri Azər Əliyevin nitqi ilə davam edib. Mənzil-qərargahının açılışı münasibətilə QHGT-nin sədri Orduxan Qəhrəmanzadəni təbrik edən A.Əliyev təşkilatın katiblik üzvlərinə öz işlərində uğurlar arzu edib. Cari keçirilən və keçirilməsi nəzərdə tutulan tədbirlərlə bağlı müzakirənin ardınca, QHGT-nin sədri Orduxan Qəhrəmanzadə ARGTMŞ-nin Təşkilatın Milli Bölməsi rolunda apardığı aktiv fəaliyyəti yüksək qiymətləndirdiyini bildirib. Daha sonra təşkilatların nümayəndələri gələcək əməkdaşlıq istiqamətləri, eləcə də resurs və məlumat mübadiləsi üzrə təkliflərini səsləndiriblər.
Qeyd edək ki, Azərbaycan Respublikasının Prezidenti İlham Əliyevin təşəbbüsü ilə təsis olunan Qoşulmama Hərəkatı Gənclər Şəbəkəsi 2022-ci il 29 iyul tarixində Şuşa Sazişi ilə Təşkilata çevrilib. Azərbaycanın sədrliyi dövründə Hərəkatın institusional inkişafı üçün atılmış mühüm addımlardan biri olan QHGT hazırda QH gənclərinin inkişafına təkan verən platforma olaraq geniş spektrli fəaliyyətlər icra etməkdədir.
Bölmənin digər xəbərləri
